Imaaliornikkut patinnik tunisisartunngorsinnaavutit

Patimik tunisisartuunissamut soqutiginninnerup annertusiartornera Peqqinnissaqarfimmit maluginiarneqarpoq. Patinnik tunisisartunngorniaruit 18-ileereersimassaatit peqqissuullutillu. Nunarsuaq tamakkerlugu patinik tunisisartut nalunaarsorsimaffiannut nalunaarneqarnissat piareersimaffigissavat, Rigshospitalimullu patinnik tunisiartorlutit angalanissat sillimaffigissallugu.

Patinnik tunisisartunngorniarlutit nalunaarniaruit aalersuutissamik aaversitartunngorniarlutit nalunaaqqaassaatit. Pateq atorneqarsinnaassappat patirminnik tunisisut nappateqannginnissaannut piumasaqaateqarneq, tamatumunnga tunngaviuvoq. Aalersuutissanik aaversittartut HIV-mut tingulluummut hepatitis-imut assigisaannullu misissotikulasuupput.

Paterminik tunisisup aaversinneraniit piffissaq aalajangersimasoq qaangiutsinnagu Rigshospitalimi misissorneqarnissaa piumasaqaataavoq. Taamaammat innuttaasut illoqarfinnit aaviisarfilinnersut tassalu Ilulissaneersut, Aasianneerut, Sisimiuneersut, Nuummeersut Qaqortumeersullu kisimik, paterminnik tunisisartunngorniarlutik nalunaarsinnaapput.

Patinnik tunisisartunngorniarlutit nalunaarniaruit, Rigshospitalimi nunarsuaq tamakkerlugu paterminnik tunisisartut nalunaarsuiffiannut: Bone Marrow Donors Worldwide (www.bmdw.org)-imut ilaasumut ilanngunneqassaatit. Nalunaarsuiffimmi ullumikkut paterminnik tunisisartut 21 millionit nalunaarsimapput, tassanngalu kalaallit patilersinnissamik pisariaqartitsisut pissarsisarput.

Patermik tunisisartutut illit patit nunarsuarmi sumiluunniit atorneqarsinnaassaaq. Illit inuttut sananeqaativit immikkoorutai ass. Italiamiup pisariaqartitaanut naapertuuppata, Rigshospitalimut aggersarneqassaatit, tassani patinnik peersissapput Italiamullu nassiussillutik. Peqqinnissaqarfiup naatsorsuutigisaa naapertorlugu, ukiut qulikkaat ingerlanerini, kalaallinik patermik tunisisinnaasunik pisariaqartitsineq annikitsuinnaassaaq.

Patermik tunisisartunngorniaraanni qanoq kinguneqarnissaa siuningaaniit paasiniaavigissallugu pingaaruteqarpoq. Attaviit ataaniittut atorlugit paasissutissat pissarsiarisinnaavatit:


http://www.givblod.dk

http://www.bloddonor.dk

http://www.rigshospitalet.dk

http://www.cancer.dk

http://www.bmdw.org