Pisanik nalunaarutiginnittarnerup pingaaruteqarnera

Piniarneq pillugu Siunnersuisoqatigiit (PPS) 2013-imi siullermeerlutik Ilulissani 24. marts 2013 ataatsimiipput, tassungalu atatillugu ukuninnga oqaaseqaateqarlutik:


1) Suli pitsaanerusumik pisanik nalunaaruteqartarnissaq kajumissaarutigeqqippaat
2) Siunissami arfanniarnerup aaqqissornissaa pillugu isumasioqatigiinnissamik siunnersuut suliniutiginiarpaa
3) Kalaalimineerniarfiit kalaalimerngillu pillugit malittarisassat qaammarsaatigineqarnissaanik pisariaqartitsineq tapersersorpaa
4) Naajat ilaannik annertunerusumik mannissarniarsinnaanermut siunnersuut tapersersorpaa
5) KANUKOKA-p sinniisuisa Siunnersuisoqatigiinni ataatsimeeqataasarnissaasa pingaaruteqarnera.

Pisanik nalunaarutiginnittarnerup pingaaruteqarnera
PPS-ip tikkuaqqippaa pisanik nalunaaruteqartarnerup pingaaruteqassusaa, taassumalu ataani kukkuneqanngitsumik nalunaaruteqartarnissap pingaaruteqarnera, pissatat annaasallugu ilanngulugit. PPS-ip siusinnerusukkut oqariartuutiginikuusaa piniakkanik killilersukkanik killilersugaanngitsunillu nalunaaruteqartussaatitaanerup pingaaruteqarnerata, taakkua uumassusilerisut tungaanniit inasssuteqaasiornerminni toqqammaviusut pingaarnerit ilagimmassuk.


PPS-ip suliniutiginiarpaa arfanniartarneq pillugu isumasioqatigiittoqarnissaa
Annertunerusumik pitsaanerusumillu arferit anginerit pisassiissutit atorluarneqarnissaat siunertaralugu, PPS-ip pingaartippaa Namminersorlutik Oqartussat kommunet kattuffiillu isumasioqatigiinnikkut oqaloqatigiissutigisariaqaraat arfanniarneq qanoq siunissami qanittumi ilusilersorneqassanersoq. Taamaasiornikkut PPS-ip 2011-mi arfernik pilattarfinnik ullutsinnut tulluarnerusunik peqalernissaq oqariartuutini malitseqartippaa, taamaasiornikkummi atorluaaneq annertunerusoq anguneqassammat.

Kalaalimineerniarfiit kalaalimerngillu pillugit malittarisassaqartitsinerup pitsaanerusumik qaammarsaatigineqarnissaa tapersersorneqarpoq

PPS-ip ataatsimiinnermini kalaalimineerniarfiit kalaalimerngillu pillugit eqqartuisarnini nangeqqillugu oqariartuutigaa nammineq inuussutissaatitsinnik kalaalimineerniarfinnillu annertunerusumik atuilluaanerunissaq pingaartuteqartoq. PPS-ip suliniut tapersersoqqippaa, kajumissaarutigalugulu Uumasut Nakorsaqarfiata Inuussutissalerinermullu Oqartussaqarfiup Kalaallit Nunaanni kalaalimineerniarfiit pillugit malittarisassat kalaalimineerniarfinnilu pissutsit pitsanngorsarnissaat annertunerusumik qaammarsaavigineqassasut.


PPS-ip sulissutiginiarpaa naajat manniinik katersisinnaanerup annertusineqarnissaa
Ingammik ukiuunerani Kalaallit Nunaanni eqqagassanik passussisarneq pitsaanerulertariaqartoq PPS-ip kajumissaarutigaa naajat tulukkallu ajornartorsiutaagaluttuinnarneri silaannakkullu angallannermut ajornartorsiortitsisinnaaneri eqqarsaatigalugit oqariartuuteqarpoq. Tassunga atatillugu PPS-ip upernaakkut naajat ilaasa manniinik annertunerusumik mannissarneqarsinnaaneri suliniutiginiarpaa ajornartorsiutip qulaani taaneqartup millisarneqarnissaa siunertaralugu. PPS isumaqarpoq annertunerusumik mannissarsinnaaneq iluaqusiinerussasoq naajanik aallaanninnermiit.


PPS-imi ilaasortat sinnerlugit

Siulittaasoq


Adam Dahl, KNAPK


Ilulissat, ulloq. 24. marts 2013


Siulittaasoq attavigineqarsinnaavoq: Adam Dahl, tlf. nr. 589971