18-t inorlugit ukiullit tigummigallarneqartarnerannut atatillugu

Inuusuttut 18-it inorlugit ukiullit Politiinit tigummigallarneqaraangata aamma parnaarussivimmut taarsiullugu inissinneqarnissaannik Eqqartuussivik aalajangiisimatillugu ikiorsiinissamut pisussaaffeqarneq pillugu
Inuusuttut 18-it inorlugit ukiullit tigummigallarneqartut parnaarussivimmullu taarsiullugu inissinneqarnissaannik aalajangiinerit pillugit suliat arlallit aallaavigalugit, ataani pineqartut erseqqissaaffigineqarnissaannut Naalakkersuisoqarfik pissutissaqarsorivoq.

Eqqartuussisarnermik inatsit naapertorlugu Eqqartuussivik aalajangiisinnaavoq tigumminnittoqarallartoqassasoq, tassungalu atatillugu aalajangiisinnaalluni, inuusuttoq - qanoq ukioqarnersoq apeqqutaatillugu – parnaarussivimmut taarsiullugu inissikkallarneqassasoq.

Eqqartuussiviup aalajangiineratigut inunnik isumaginninnermi oqartussaasut, inuusuttup 18-it inorlugit ukiullip paarnaarussivimmut taarsiullugu inissiivimmut inissinnissaassanut pisussaaffeqarput.

Isumaginninnermi oqartussaasut tassaapput Naalakkersuisut kommunalbestyrelsillu.

Meeqqanut inuusuttunullu ikiorsiisarneq pillugu Inatsisartut peqqussutaat naapertorlugu pisariaqartitsisoqartillugu Naalakkersuisut meeqqanut inuusuttunullu ulloq-unnuarlu paaqqinnittarfinni immikkoortortanik matoqqasunik pilersitsisinnaapput.Immikkoortortat matoqqasut tassaapput meeqqanut inuusuttunullu ulloq-unnuarlu paaqqinniffinni immikkoortortat matunik silarlernik igalaanillu parnaaqqajuaannartunik pilersitsiffiunissaminnut akuerineqartut.

Inatsisartut peqqussutaanni aammattaaq aalajangersarneqarpoq, meeqqat inuusuttullu eqqartuussisarnermik inatsit malillugu politiinit tigummigallarneqartut eqqartuunneqartulluunniit meeqqanut inuusuttunullu ulloq-unnuarlu paaqqinniffinni immikkoortortani matoqqasuni inissinneqassasut. Aalajangersagaq aamma atuutsinneqarpoq, meeqqanut 12-it 15-inillu akornanni ukiulinnut peqqarniitsumik pinerluuteqarsimasunut, meeqqap isumassornissaata inissiinissaq pisariaqalersippagu.

Tassa meeqqanik inuusuttunillu ikiorsiisarneq pillugu Inatsisartut peqqussutaanni aalajangersarneqareerpoq, inuusuttup eqqartuussisarnermik inatsit naapertorlugu politiinit tigummigallarneqartup, parnaarussivimmut taarsiullugu inissinneqarsinnaanera. Meeqqalli inuusuttullu pillugit peqqussut naapertorlugu igalaat matullu silarliit parnaaqqatinneqarnissaat eqqaassanngikkaanni allatut pissaanermik atuinissamut inatsisitigut tunngavissaqanngilaq. Assersuutigalugu allakkat nakkutigineqarnissaat aamma pulaartut nakkutigineqarnissaat pillugit inatsisitigut tunngavissaqanngilaq.

Kisianni meeqqanut inuusuttunullu nuna tamakkerlugu atuuttussamik ulloq-unnuarlu paaqqinnittarfimmi immikkoortortaqarfimmik matoqqasumik pilersitsisoqarsimanngilaq, taamaammmat parnaarussivimmut taarsiullugu taamaallaat inissiisoqarsinnaavoq, suliniuteqarfinni siunertamut atuuttussatut pilersinneqartuni.

Periusiuvoq Naalakkersuisoqarfimmi ulloq-unnuarlu paaqqinnittarfinnut immikkoortortaqarfiup taamatut suliniutaagallartunik pisariaqalerfiatigut pilersitsisarnera.

Parnaarussivimmut taarsiullugu inissiinermut aningaasaliissutinut tunngatillugu inunnik isumaginninnermi ikiorsiisarnermi atuuttoq tassaavoq - meeqqanut inuusuttunullu tunngatillugu peqqussummi ikiorsiissutit allat assigalugit - inissiineq kommuninit aningaasaliiffigineqartarnera.

Nuna tamakkerlugu meeqqanut inuusuttunullu ulloq-unnuarlu paaqqinniffiit ingerlannissaannut killiliussatut isumaqatigiissutaasut iluanni suliniutinut aningaasanik immikkoortitsisoqarpoq; aningaasat taakku inunnik isumaginnittoqarnerup iluani inissiilluni tigummigallagassanngortitsinerup aningaasalersornissaanut iluaqutaasinnaapput; aningaasalersuinerup sinnerata akilernissaa kommunimit inuup inissinneqarluni tigummigallarneqartup kommunianit najugarisavianit isumagineqassaaq.

Suliassat ataasiakkaat pilernerini kommunit Naalakkersuisoqarfiup ullo-unnuarlu paaqqinniffninnut immikkoortortaqarfia atavveqarfigisartussaavaat, isumaginninnerup iluani parnaarussivimmut taarsiullugu inissiigallarfiusussamik pilersitsinissaq siunertaralugu, tamanna meeqqat inuusuttullu pillugit peqqussutip sinaakkusiussaasa iluanni pisinnaappat.

Ilanngullugu oqaatigineqassaaq, meeqqanut inuusuttunullu tunngatillugu peqqussummi inuusuttup pineqaatissinneqarsimasup immikkoortortamut matoqqasumut inissinneqarsinnaaneranut tunngatillugu inatsisitigut atugassarititaasut naammaginartuummata.