Kalaallit Nunaannut angusat pitsaasut

CITES COP16-imi (Washington Konvention) ataatsimeersuarnermi Kalaallit Nunaat nannut pillugit siunnersuutip suliarineqarnerani angusarissaartoq.

Kalaallit Nunaata ilungersuullugu sulilluarneranik tunngaveqartumik nannut pillugit CITES-imi ataatsimeersuarnermi angusaqarluarpoq. Ataatsimeersuarneq Bangkok, Thailand-imiittumi pivoq CITES 16-nissaa ataatsimeersuarnerani.

Teknikkikkut ataatsimiinnermi USA-p siunnersuutaa nanoq CITES-p Allattorsimaffiani II-miit Allattorsimaffik I-mut nuunneqarnissaa taasisitsinermi akuerineqanngilaq 42-t itigartitsisut, 38 tapersersuisut kiisalu 46-t tapersiinatilluunniit itigartitsinngitsut. Taasinermi piumasaqaataavoq 66 %-mik amerlanerussuteqarnissaq.

EU-mi Siulittaasuutitaqartut allamik naapeqataaffiusinnaasumik siunnersuuteqarmat taasititsinermi 43-t itigartitsipput, 63-p akuersisut 17-illu tapersiinatilluunniit itigartitsinngitsut.

USA-p siunnersuutaanut ilassutitut EU-p siunnersuutigigaluarpaa ukiumoortumik tunisassianik nanoqatigiikkuutaarlugit immikkoortitikkanik avammut annissisinnaanerup eqqunneqarnissaa.

Siunnersuutip itigartinneqarnera isumaqarpoq, nannut CITES-ip Allattorsimafiani II-miiginnarnissaa, taamaasilluni avammut annissisinnaaneq akuerineqarsinnaalluni, niuernerup nannut amerlassusaannut ajoqutaassanngippat.

Allattorsimaffimmut I-mut nuussinermi nannunit pisunit tunisassiat avammut annissineq inerteqqutaalluinnalissagaluarpoq taamaallaat ilisimatusarnermut siunertalimmik aammalu inuup nammineq pigisaanik annissinerit immikkut akuerineqarsinnaallutik.

Maannakkut Kalaallit Nunaata nannut pillugit nammineerluni avammut annissinissaq unitseqqavaa april 2008-mili ikiliartuutaasumik atuinertut inissisimanera pissutigalugu (Non-Detriment-Finding (NDF)). Inissisimaffia pitsaasumut allanngussagaluarpat avammut niueruteqarsinnaanerup eqquteqqinneqarsinnaanera nalilersorneqarsinnaavoq, taassuma ataani piffinni aalajangersimasumik toqqakkani akiliuteqartitsilluni nannunniartitsinissap eqqunneqarsinnaanera nalilersorneqarsinnaalluni.