Arctic Green Food A/S-ip akiliisinnaajunnaarnera

Arctic Green Food A/S-ip akiliisinnaajunnaarnerata kingunerisaanik pisortatigoortumik oqallinnermut atatillugu aammaarluni erseqqissaatigineqaqqissaaq aalisartut tunitsivis­saqarnissaasa qulakkeerneqarnissaa anguniarlugu suli Aalisarnermut, Piniarnermut Nunalerinermullu Naalakkersuisoqarfik suliaqarmat, tassunga nipisaat suaasa tunineqarsinnaanissaat ilanngullugu. Ilaatigut aaqqiissuteqarnissamut Royal Greenland A/S oqaloqatigalugu tamanna qulakkeerniarneqarpoq.

Inatsisartunut qinersinissaq peqqutigalugu Naalakkersuisullu nutaat inissititereerneratigut aatsaat politikkikkut aalajangiisoqarsinnaammat, tunitsivissaqartitsineq allatut ittoq aaqqissuunneqarnissaannut ingerlatsisinnaaneq pillugu tamatuma kingorna aalajangiisoqarsinnaavoq.

Akiliisinnaajunnaarnissaq sioqqullugu Aalisarnermut, Piniarnermut Nunalerinermullu Naalakkersuisoqarfiup ingerlatseqatigiiffiup ingerlanneqarnera malinnaavigisimavaa ingerlatsinermullu tunngasutigut pissusissaanngitsunik iliuuseqartoqartoq maluginiarsimallugu, tamakkualu ingerlatseqatigiiffimmut uparuartarsimallugit.

Arctic Green Food A/S-ip akiliisinnaajunnaarneranut tunngatillugu Namminersorlutik Oqartussat annertuumik piumasaqarnissamikkut pisassaqarnerat tunngavigalugu Aalisarnermut, Piniarnermut Nunalerinermullu Naalakkersuisoqarfiup akiliisinnaajunnaartumut naatsorsuisutut nakkutilliisussatut toqqarneqartumut pissutsit piviusuusut pillugit qulaajaaneranut paasissutissiinissaminut neqerooruteqarsimavoq. Nakkutil­liisussatut toqqarneqartoq taamaasilluni aqutsisuusimasunut imaluunniit akiliisinnaajunnaarnerup pinnginnerani aalajangiisimanernut tunngasunik allannguisoqarsinnaaneranut nalilersuinissaanut aamma akisussaatitsinissamik nalilersuineranut tunngavissinneqaqqullugu.