Nersorinnilluni 2012-imi akissarsiaq

Immikkoortumi ”Tamatsinnik pinngortitamik avatangiisinillu mianerinninnissatsinnik ilisimaarinnilersitsineq” Namminersorlutik Oqartussat Pinngortitamik Avatangiisinullu mianerinninneq pillugu nersorinnilluni 2012-imi akissarsiaq Ipiutaq Guest Farm-imut, Agathe Devismemit aamma Kalistat Poulsenimit pigineqartumut tunniunneqarpoq.

Februarip 11-iani 2013-imi katerisimaarnermi Nunamut Namminermut Avatangiisinullu Naalakkersuisup Anthon Frederiksen sinnerlugu Kommune Kujallermi Borgmesterip Simon Simonsenip Namminersorlutik Oqartussat Pinngortitamik Avatangiisinillu mianerinninneq pillugu nersorinnilluni 2012-imi akissarsiaq Ipiutaq Guest Farm-imut, Agathe Devismemit aamma Kalistat Poulsenimit pigineqartumut tunniuppaa, immikkoortumi ”Tamatsinnik pinngortitamik avatangiisinillu mianerinninnissatsinnik ilisimaarinnilersitsineq”.

Inuit, sullissiveqarfiit, suliffeqarfiit soqutigisaqaqatigiiffiilluunniit tamatsinnik pinngortitamik avatangiisimillu mianerinninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit akissarsiaq tunniunneqartarpoq.

Pinngortitamik Avatangiisinillu mianerinninneq pillugu nersorinnilluni 2012-imi akissarsiap Ipiutaq Guest Farm-imut, Agathe Devismemit aamma Kalistat Poulsenimit pigineqartumut tunniunneqarneqarnissaanik Naalakkersuisut toqqaagamik imaattumik tunngaveqarput:

“Ipiutaq Guest Farm, Kalistat Poulsenimit aamma Agathe Devismemit pigineqartoq 2005-imi pilersinneqaramili avatangiisit nukissallu minguitsup atorneqarnissaa qitiutillugit pingaartittuarsimavai. Avatangiisit paarinissaat aamma angerlarsimafiit suliffeqarfiillu angisuut avatangiisit ikiorserniarlugit qanoq iliortoqarsinnaaneranut aamma isumassarsiorfissatut savaatilimut Ipiutaq Guest Farm assersuutissaavoq pitsaasoq.

Ipiutaq Guest Farm 2005-imili tamaani annertuumik saliisimavoq, eqqakkanillu katersuilluni savaateqarfinnut umiarsuarmik aallertoqartalernissaanik periarfissanik misissuilluni aallartitsisimalluni. Aammattaaq seqernup nukinganik iluaquteqarniarluni atortunik ikkussuisimalluni, nukissiornermi dieselimik atuineq annikillisarniarlugu aamma tamaani nerisassiassat pissarsiarineqarsinnaasut atorluarneqarnissaat annertuumik iliuuseqarfigisimallugu.”

Nunamut Namminermut, Pinngortitamut Avatangiisinullu Naalakkersuisut Anthon Frederiksen sinnerlugu Kommune Kujallermi Borgmesterip Simon Simonseip tunniussinermi oqaasii tusagassiorfinnut nalunaarummut matumunnga ilanngunneqarput.

Oqalugiaat uani atuarneqarsinnaavoq.

Assiliisoq: Ole Mølgaard-Motzfeldt