Ulloq unnuarlu paaqqinnittarfiit immikkoortortaqarfiat allanngueqataavoq

Ulloq unnuarlu paaqqinnittarfiit Namminersorlutik Oqartussaneersut

Ulloq unnuarlu meeqqanut inuusuttunullu paaqqinnittarfiit pulaaraagatsigit, misigikkajuttarparput pissutsit piviusumi allaanerujussuusut, ullutsinni aviisini atuartakkatsinniik il. il. Meeqqat naapittarpagut oqaluttuartut misigisinnaallugu ineriartornertik, kammattaartornertik aammalu inersimasunit nuannarineqarlutik, aallukkusunneqarlutik aammalu sinnerlutik sinnattoqartitsisunik.


Meeqqat inuusuttullu amerlasuut ulloq unnuarlu paaqqinnittarfinniipput. Meeraapput inuusuttuuppullu, ajornartorsiortumik meeraasimasut aammalu ajornartorsiutinik artornartunik nammatallit, taamaasillutik inuuniarnerat artornarsinnaasarluni. Meeraapput persuttarneqarnermik misigisaqarsimasut, atornerlutsissimasartut aammalu ilaquttaminniit aningaasatigut inooqatigiinnikkullu ajornartorsiortunik sumiginnagaasarsimasut.


Ulloq unnuarlu paaqqinniffinni sulineq tassaavoq inuiaqatigiinni sanngiinnerusunut allanngueqataanissaq. Siunertarineqartarpoq sinaakkuseeqataanissaq, nukappiaqqat niviarsiaqqallu najugaqartut meeqqatuulli allatut inuuneranni periarfississagaanni. Aqutsisut sulisullu ullut tamaasa toqqissisimanartunik avatangiiseqarnissaq sinaakkuserniartarpaat, meeqqat ineriartorsinnaaniassammata. Taamaalilluni nunatsinni ulloq unnuarlu paaqqinniffiit suliniuteqarfiginissaat pingaartorujussuuvoq.


Assersuutissaalluartut tassaakkajuttarput, meeqqap aggerfiata kommunerisaanik suleqateqarluartarneq. Nakkutilliilluta ornigukkaangatta, suliat ingerlaneri misissortarpagut, kommuunip paaqqinniffiullu qularnaarniarsimasaat meeqqamut naleqquttumik neqerooruteqassappat suleqatigiilluarsimaneq. Suliat takusarpagut kommuunip nassuiaatersuutai aammalu suliassamut pilersaarusiai, meeqqap paaqqinniffimmut pinissaanut sulisut piareersimalluarnissaannut ikiuutaasartut. Suliassallu takusarpagut, sulisup meeqqap aggerfianut aallertartut meeqqap avatangiisai aammalu attaveqarfigisartagai ilikkagaqarfigiartorlugit, taamaasilluni qajassuartumik meeraq ikaarsaarniassammat.


Isumaqarpugut pingaartuusoq oqaluttuatsialaat oqaluttuarineqartarnissaat, taamaalilluni paaqqinniffinni aqutsisut aammalu sulisut sulinerat pingaaqisoq akuersaarneqartarniassammat. Nuannaarutigaarpullu Deloittep paaqqinniffiit 2011-mi aallaavigalugit misissugaata naqissusermagu: ”Ulloq unnuarlu paaqqinniffiit ilaatigut ilisarnaatigimmassuk tunniusimasunik sulisoqarnertik aammalu aqutsisoqarnertik, meeqqat inuusuttullu inooqatigiinnikkut ajornartorsiutillit ikiorniarlugit iliuuseqangaatsiartartunik”.


Ilanngullugu ilisimavarput, suli suliassarujussuaqartoq, ulloq unnuarlu paaqqinniffiit piumasarisaat ineritsinniassagutsigu, tassalu meeqqanik inuusuttunillu sakkortuumik misigisaqarsimasunik sullissiniartarneq aammalu nappaatip suussusianik aalajangiisarnissamik pisariaqartitsisarneq. Taamaammat pineqartut nukittorsartuarnissaat sulissutigiuarparput.


Ilaatigullu ingerlatanik aallartisaasimavugut, innuttaasunut kommuninullu sullissinermik pitsannguinissaq anguniarlugu. Soorlumi aamma ilaqutariinnut sullissivissamik pilersitsiniarluta suliniuteqalersimasugut, sumiginnaasarneq ingalassimatinniarlugu, taassumunngalu tunngasumik suleqatigilluinnarparput Qaasuitsup Kommunia.


Ulloq unnuarlu paaqqinnittarfiit immikkoortortaqarfianni kommunit sullilluarnissaat kissaatigaarput. Taamaasilluta Qitiusumik Utaqqisut Allattorsimaffiat pitsanngorsarparput, kikkut tamarmik tassunga tunngassutilinnik paasissutissanik kisitsisinillu pisariaqartitsisut siunissami ajornannginnerusumik ingerlatseriaatsimik atuisinnaalerniassammata. Soorlu ingerlatseriaaseq sullissisunut eqqaasitsissutinik nassitsisinnaalissaaq, meeqqanut inuusuttunullu inissinneqarsimasunut tunngassutilinnik suliassaqaraangat. Tamanna ingerlatseriaaseq Kommuneqarfik Sermersuumi sullissisut kajumilluinnartut oqaloqatigineratigut inerisagaavoq.


Saniatigut naammassilerparput sullissinermi ikiuutaasinnaasoq, tassalu arlaannik kiap meeqqat inuusuttullu sullinnissaannik pisussaaffeqarneranik imaluunniit inuit annertuumik innarluutillit sullinnissaannut nalornissuteqaraanni akissutissarsiorfigineqarsinnaasoq. Naatsorsuutigaarput, innuttaasut sullittariallit sullilluarnissaannut sullissisunut suliaqareeqisunut oqilisaasseqataasinnaassasoq.


Ulloq unnuarlu paaqqinnittarfiit immikkoortortaqarfiata nittartagassaata nutaap, pineqartunik paasissutissanik paarlaasseqatigiinnissaq qulakkiissavaa aammalu suliniutigineqartut ingerlanneqartullu ammanerusumik paasissutissiissutigineqarsinnaalissallutik. Nittartagaq, www.uupi.gl atuisut inatsisinik, paasisanik, ingerlatanik aammalu arlaannik tulluarsinnaasunik paasissutissanik aallerfissatut atorluarsinnaavaat. Nittartakkamissaaq nanineqarsinnaassapput ulloq unnuarlu paaqqinniffinnik nassuiaatit aammalu nakkutilliilluni pulaarnermi nalunaarusiat nutaajunerpaat.


Neriuppugut, uuma allatap ulloq unnuarlu paaqqinniffinni kommunenilu sullissisut suliaanik akuersaarutitullusooq atuukkumaartoq. Qularinngilarput, suleqatigiinnikkut nutaaliornermik aammalu isumaliuutaalluartumik ineriartortitsiumaartugut, ataatsimoorlutalu ulloq unnuarlu paaqqinniffiit kivikkumaarigut aammalu ammanerulernermik paasissutissanillu paarlaasseqatigiinnerulernermik kinguneqarsinnaajumaartoq.


Inuiaqatigiit akisussaaffigaat, kikkut tamarmik naligiimmik periarfissinneqarnissaat inuunerminni piginnaasarilluakkamit inerisarsinnaanissaat. Tamanna minnerunngitsumik inuiaqatigiinni sanngiinnerusunut pisariaqarluinnarpoq, tassaammatami imminnut ikiorsinnaanngitsut. Meeqqat inuusuttullu taama sumiginnarneqartartillugit, angerlarsimaffiiniit qimagutsittariaqarlugit, pisussaaffigaarput iliuuseqarnissaq. Taamaattumillu pingaaruteqarluinnarpoq, angerlarsimaffissaannik nutaamik neqeroorfigisarnissaat, toqqissisimaffigisinnaasaannik, takuneqarfissaannik, tusaaneqarfissaannik aammalu periarfissinneqarfissaannik. Tamannami sulinitsinni qitiuvoq.