Imarsiornermi qitiusumik ilinniarfik

Imarsiornermi qitiusumik ilinniarfik nutaaq Nuummi pilersinneqassaaq

Imarsiornermi qitiusumik ilinniarfimmik nutaamik pilersitsisoqassaaq, Imarsiornermik Ilinniarfik, naalaganngornianut ilinniartitaanerit ilanngullugit kiisalu Piniarnermut aalisarnermullu ilinniarfik Uummannamiittoq tassunga nuunneqartussanngorlutik.

Tamanna Naalakkersuisunit aalajangerneqarpoq ulloq 3. januar 2013. Ilanngullugu aalajangerneqarpoq piniarnermut aalisarnermullu ilinniartitaanernut tunngatillugu suliffinnik misiliinnerit Sisimiuni ingerlanneqartassasut, pikkorissartitsisarfik Uummannami pilersinneqassasoq kiisalu ineriartornermikkut ajornartorsiuteqartunut sullissivimmik Paamiuni pilersitsisoqassasoq.

Naalakkersuisut Komuuneqarfiit ataasiakkaat oqaloqatigereerpaat siunissami illuutit Uummannami Paamiunilu qimanneqartussat qanoq atorneqarsinnaanerinik.

Aalajangernermut tunngaviusoq

Aalajanernermi tunngavilersuutit pingaarnerit ilagaat ilinniarnerminnik taamaatitsiinartartut amerlavallaarnerat, illiniakkanut tunngatillugu naammattunik attavissaqartannginneq kiisalu imarsiornermik inuussutissarsiuteqartunit ujartorneqartartutut pikkorissarnissamik neqeroorutaasartut annikippallaarnerat. Ajornartorsiutimmi taaneqartut ilaatigut kingunerisaanik imarsiornerup iluani piginnaasaqarluartunik sulisoqarnissamik aalisariutaatillit umiarsuarnillu assartuisartut kissaataat Namminersorlutik Oqartussanit naammassineqarsinnaasanngillat.

Imarsiornermi qitiusumik ilinniarfeqalernissamut siunertarineqartut eqikkarlugit ima saqqummiunneqarsinnaapput:

• Aningaasaliissutit ullumikkut ilinniartitaanermut atorneqartartut pitsaanerusumik atorneqartarnissaat.

• Ilinniartitaanerit akimorlugit ataatsimut ilinniartitsisoqarnikkut, ilinniarnermi siunnersorteqarnikkut allaffeqarfeqarnikkullu ilinniartitaanernut aningaasaliissutit pitsaanerusumik atorneqarsinnaanissaat.

• Suliassaqarfiit ataasiakkaat iluini ataqatigiissitsineq taamaasiortoqarneratigut qulakkeerniarlugu suliassat pitsaanerusumik suliarineqartarnissaat ilinniartullu pitsaanerusumik sullinneqartalernissaat.

• Imarsiornermik inuussutissarsiuteqartunik qanimut suleqateqartarnerit pilersinneqarnissaat periarfissinneqassaaq, ilinniartitaanernut, inuussutissarsiuteqartunut suliffissaqartitsinermullu iluaqusiisussamik.

Qaasuitsup Kommuneata innersuutigaa, ilinniarfimmi Uummannamiittumi inuusuttut siunissami suliffiulertussanut piginnaasaqalernissaat qulakkeerniarlugu Uummannami qitiusumik ilinniarfeqalernissaa. Aappaatigut ilinniarfiup inuussutissarsiutitigut ilinniarfiit piareersarfiattut ammalu pikkorissartitsiviattut atorneqarsinnaanera eqqarsaataavoq.

Aalajangerneq pillugu Imarsiornermik Ilinniarfimmi siulersuisut oqaaseqarput:
- Imarsiornermut Ilinniarfiup Paamiunit Nuummut nuunneqarnissaa pillugu Naalakkersuisut aalajangernerat Imarsiornermik Ilinniarfimmi siulersuisuni ilaasortanit tamanit tapersersorneqarpoq. Siulersuisut ilutigalugu nuannaarutigaat Naalaganngorniat ilinniarfiata Nuummi ammaqqinneqarnissaa pillugu Naalakkersuisut aalajangersimammata. Ilinniartitaaneq taanna ukiuni arlalissunni assoralisimasimavoq. Taamatuttaaq ippoq aalisartunut piniartunullu ilinniarfik eqqarsaatigalugu.

- Aalisarnerup imarsiornerullu iluani ilinniartitaanerit assigiinngitsut siuliani taaneqartut nunatsinni isorartoqisumi najukkani assigiinngitsuni inissisimasimasut massakkut katersorneqartussanngorput ilinniartitsinerillu eqqarsaatigalugit kattutitsineq pitsanngoriartitsissaaq. Tulluartunik ilinniartoqartalersinnaanissaq ajornannginnerulissaaq, ilinniarluarsimasunik ilinniartitsisoqarniartarneq ajornannginnerulissaaq, ilinniartut inini nutaani ilinniartinneqartalissapput pitsaanerusunillu ineqartinneqartalissallutik.

- Aningaasaqarneq eqqarsaatigalugu ingerlatat eqitenerisigut iluaqutissiisoqassaaq, isumaqaratta siunissami fagit ataasiakkaat ataatsikkut ingerlanneqarsinnaalluartut. Isumarput malillugu timelærerinik fagit ilaannut ilinniartitsisoqartarnissaq ajornannginnerulissaaq. Umiarsuaatileqatigiit angisuut Nuummi allaffeqarfeqartiterput, taamaanneratigut ilinniartut illinniakkaminnik ingerlatseqqinniarlutik umiarsuarni inuttaaqqaartariaqartartunut praktikkerfissarsisarsinnaanissaat ajornannginnerulissapputtaaq.



Imarsionermi ilinniarfiit kattussuunneqarnissaanik aalajangernermikkut Naalakkersuisut imarsiornermi suleqatigiissitap Ilinniartitaanermut Ilisimatusarnermullu Naalakkersuisoqarfimmit pilersinneqarsimasup, imarsiornermik inuussutissarsiuteqartut kiisalu Imarsiornermik Illinniarfiup siulersuisuisa Nuummi imarsiornikkut qitiusumik ilinniarfimmik pilersitsisoqarnissaanik kaammattuutaat taamaasillutik Naalakkersuisunit ingerlateqqinneqarput.