AGF-ip aningaasaqarniarnera pillugu

Namminersorlutik Oqartussat nunaqarfinni tunitsiviit sullinneqarnissaat siunertaralugu Arctic Green Food A/S-imik ukiuni arlaqalersuni kiffartuussinissamik isumaqatigiissuteqartarsimapput. Aalisarnermut, Piniarnermut Nunalerinermullu Naalakkersuisoqarfik kiffartuussinissamik isumaqatigiissummut tunngatillugu akisussaasutut 2012-imut 2013-imullu atuuttussamik isumaqatigiissuteqarnikuuvoq. Isumaqatigiissut kingulleq 2. januar 2012-imi isumaqatigiissutigineqarpoq.

Ingerlatseqatigiiffik 15. februar nalunaarpoq ingerlatseqatigiiffik akiliisinnaassuseeruttoq.

Ingerlatseqatigiiffiup aningaasaqarniarnera aaqqiiffiginiarniarlugu siulersuisuni siulittaasunngoqqammersup Namminersorlutik Oqartussanut nalunaarutigaa Namminersorlutik Oqartussat piginneqataasut allat peqatigalugit aaqqiissuteqarniassasut, ilaatigut 2013-imut kiffartuussinissamik isumaqatigiissummi aningaasaliissutigineqartussat 2,1 mio. kr.-iusut siumoortumik atugassanngortinnerisigut. Taamaasiortoqarneratigut ingerlatseqatigiiffiup nipisaat suaasa tunineqarsinnaanerata tungaanut ingerlaannarsinnaanissaa qulakkeerneqassaaq. Taamatut aaqqiisoqarneratigut ukiup naanissaanut ingerlatsiinnarsinnaanissaq qulakkeerneqanngilaq.

Inatsisartunut qinersisoqartussanngornerata kingunerisaanik Naalakkersuisut aalajangiivinnissaminnut periarfissaqanngillat. Naalakkersuisuugallartut atorfilittatigoortumik suliat ingerlaannarsinnaanissaat qulakkeerniarlugu pisariaqavissunik kisimik iliuusseqarsinnaatitaapput.

Naalakkersuisoqarfiup pissutsit ingerlaavartumik nalilersortarpai. Qullersat nalunaarutaanni ilaatigut allassimavoq ingerlatsineq qulakkeerneqassappat silap pissusaa apeqqutaasorujussuussasoq aammalu ingerlatseqatigiiffiup tunisassiarisartagaannut pingaarnernut pingaartumik nipisat suaannut tunngatillugu akit ineriartorneri apeqqutaasorujussuussasut aammalu akiliisinnaassuseqannginneq qaangerneqaqqaartariaqartoq siullermik suanniarnissap tungaanut.

Ingerlatseqatigiiffiup ilanngullugu nalunaarutigaa kiffartuussinissamik isumaqatigiissummi piumasaqaataasut eqqarsaatigalugit kiffartuussinissamut aningaasaliissutit 7 mio. kr.-iusut kisiisa atorlugit ingerlatseqatigiiffiup ingerlatiinnarniarnissaa ajornarluinnassasoq.

Tamanna tunngavigalugu Aalisarnermut, Piniarnermut Nunalerinermullu Naalakkersuisoqarfik aalajangerpoq Arctic Green Food A/S-ip massakkorpiaq aningaasatigut ilungersinartumik inissisimanera qaangerniarlugu aningaasaliisoqarneratigut aaqqiissuteqarnissamik siulersuisuni siulittaasup kissaataa massakkuugallartoq aalajangiiffigineqavissinnaanngikkallartoq.

Najukkani AGF-ip tunitsiveqarfigisaanni aalisartut eqqorneqartut allatut aaqqiiffigineqar-sinnaanissaat Naalakkersuisoqarfimmit sulissutigineqarpoq, pingaartumik nipisat suanniarneq aallartingajalersoq eqqarsaatigalugu. Naalakkersuisoqarfiup pingaartippaa aalisartut tunitsivissaqartuarnissaasa qulakkeerniarneqarnissaa. Pissuserissaarnissaq eqqarsaatigalugu ilisimatitsissutigineqassaaq siunissami aaqqissutaajunnartut Naalakkersuisunit qinersisoqareerpat isummerfigineqarumaarmata.