Inuusuttut pinerlunniartartut iliuuseqarfigisariaqarpavut

Ilaqutariinnermut Naalakkersuisup, Mimi Karlsen-ip Meeqqat Illersuisuat isumaqatigilluinnarpaa oqarmat, inuusuttut pinerlunniartalersimasut iliuuseqarfigisariaqarivut, aammalu inuusuttut pinerlussimasut tigummigallarneqartussat pinerluttunut inissiisarfinni inersimasut pinerlussimasut akornanni inuusuttut pinerlussimasut inissittariaqanngitsut. Taamaammat nalornissutigineqarsinnaanngilaq inunnik isumagininnermik oqartussaasut, tassalu kommunit Naalakkersuisullu inuusuttunut pinerluttalersimasunut, 18-it inorlugit ukiulinnut ikiorsiissutissanik naleqquttunik pilersitsinissaminnik akisussaasuusut.

Meeqqat illersuisuat Naalakkersuisut isumaqatigilluinnarpaat inuusuttunut pinerluttalersimasunut iliuusissat tigussaasut iliuuseqarfiginiarneqarneranni nutaamik inatsisiliornissaq utaqqiinnarsinnaanngikkaat, massakkulli inatsisit atuuttut sinaakkutaasa iluanni periarfissat iliuuseqarnissami atorniartariaqartut.


Inuusuttut pillaatissinneqarsimasut eqqarsaatigalugit matoqqasumik immikkoortortaqalernissamik Naalakkersuisut suliniuteqarnertik ingerlateqqissavaat.


Pisuni aalajangersimasuni Naalakkersuisoqarfiup paasigaangamiuk inuusuttunik pinerluuteqarsimasunut inissiisarfimmiittoqartoq, Naalakkersuisoqarfiup kommunit immikkut ittumik periuseqarnissamik neqeroorfigisarpai. Tamannali itigartinneqartarpoq iliuuseriniakkap akisuallaarnera innersuussutigineqartarluni, imaluunniit kommunit itigartitsisarlutik innersuussutigalu pinerluuteqarsimasunik isumaginnittoqarfiup tamanna suliassarigaa. Soorunami tamanna iluariinnagassaanngilaq. Inuusuttup parnaarussivittut ittumi inissinneqarnissaat eqqartuussiviup aalajangeraangagu, taava ikiorsiisarnermi oqartussat pisussaaffilerneqartarput inuusuttut 18-it inorlugit ukiullit parnaarussivitut ittumi inissinneqarnissaannut.


Pingaaruteqarpoq naqissusissallugu inatsisit massakkut atuuttut pitsaanerpaanngikkaluartut, inatsisit atuuttut sinaakkutaasa iluanni Naalakkersuisut pisinnaasartik tamaat iliuuseqarusuttut. Taamaaliortoqassappalli kommunit pinerluuteqarsimasunillu isumaginnittoqarfiup aalajangersumik pisoqartillugu qanittumik ikioqatigiittarnissaat.


Inussuarnersumik inuulluaqqusillunga
Mimi Karlsen