Siunnersuisoqatigiit oqaaseqaataat

Piniarneq Pillugu Siunnersuisoqatigiit 2012, decembarip 19-iani ataatsimiinnerminni oqaaseqaataat

2012-imi naggataarutaasumik Piniarneq Pillugu Siunnersuisoqatigiit decembarip 19-iani ataatsimiipput. Ataatsimiinnermi ilaatigut eqqartorneqarput 2013-imi piniakkanik killilersukkanik pisassiissutissatut Aalisarnermut, Piniarnermut Nunalerinermullu Naalakkersuisoqarfimmit (APNN) siunnersuutigineqarsimasut.

Arfernik angisuunik pisassiinissaq
Naluneqanngitsutut 2012-imi aasaanerani Arfanniarneq Pillugu Nunat Tamat Akornanni Ataatsimiititaliarsuarmi (IWC) Kalaallit Nunaat ukiuni tulliuttuni arfernik angisuunik pisassiisinnaanissaminut taperserneqanngilaq. Tamannalu annertuumik ajuusaar­nartuuvoq. Maanna Kalallit Nunaanni Naalakkersuisut ukiut pisassiiviusut kingulliit assigalugit, 2013-imi pisassiinissamut siunnersuusiorsimanerat, Piniarneq Pillugu Siunnersuisoqatigiinniit taperserusupparput.

Eqqaamassavarpummi nunat allat oqaraluarpata Nunarput arfernik angisuunik pisassiissanngitsoq, nunap inoqqaavisut pisinnaatitaaffigaarput pisassiissutissanik aalajangersaasinnaassalluta.

Ukiunimi kingullerni nerisassianik Nunatsinneersunik atuinerulernissaq anguniartillugu, sinerissamilu neqissaqarniarnermik qulakkee­riniar­tilluta arfernik angisuunik arfanniartortagut pisassaqarsinnaasariaqarmata. Ullumikkut arfanniutinik angallataatillit arlallit inuussutissarsiummik taassumanngaannaq ingerlatsi­suupput, aalisarnermullu nooriarsinnaaneq ajornaatsuinnaanani. Taamaattumik Piniar­neq Pillugu Siunnersuisoqatigiinnit Naalakkersuisut siunnersuutaannut tapersiinerput matumuuna apuupparput.

2013-mi piniakkanik killilersukkanik pisassiissutissat
APNN-imit 2013-imi aarrinik, nannunik qilalukkanillu qernertanik qaqortanillu pisassiis­sutissasut tusarniutigineqartut Piniarneq Pillugu Siunnersuisoqatigiinnit akuersaar­neqarput, imatulli qaavatigut innersuussutitaqartumik:

Aarrit; uumasoqatigiiaani Kitaata-Avannaaneersunit pisassiissutit 94-inut amerline­qas­sasut.

Nannut; uumasoqatigiiaani Kane Basinimeersunit pisassiissutit 15-inut amerline­qas­sasut.

Qilalukkat qernertat; Uumasoqatigiiaani Kitaaneersunit Upernavimmut pisassiissutit 30-nik ilaneqas­sasut.

PIsassiissutit amerlineqarnissaannut tunngavilersuutigineqarpoq, uumasoqatigiiaat amer­­las­­susaannut naleqqiullugu pisassiissutit naapertuutinngimmata. Ukioq naallugu piniartoqarfiit neqissaqarniassappata, pisassiissutit amerlineqarsinnaanissaat Siunner­suisoqatigiinnit pissusissamisoorsorineqarpoq.

Ukiumut qaangiuttumut Piniarneq Pillugu Siunnersuisoqatigiit qujarusupput.

Inussiarnersumik inuulluaqqusillunga

Adam Dahl
Siulittaasoq, PPS