Qineqqusaarnermi atugassanik partiit aningaasanik qinnuteqaataat


2010-mi aningaasanut inatsisip akuersissutigineqarneratigut aalajangiunneqarpoq qinersisoqarneranut atasumik qineqqusaarnermi atugassanik partiinut tapiissuteqartarneq atorunnaarsinneqassasoq. Taamaalilluni qineqqusaarnermi atugassanik aningaasanik immikkoortsisarneq ukiorpassuarni periuserineqartartoq atorunnaarsinneqarpoq.

2013-imut aningaasanut inatsisissamut siunnersuutip ukiakkut 2012-imi katersuunnermi suliarineqarnerani Aningaasaqarnermut Akileraartarnermullu Ataatsimiititaliaq 2013-imut aningaasanut inatsisissap aappassaaneerlugu suliarineqarnissaanut isumaliutissiissuteqarpoq, tassani ilaasortat amerlanerussuteqartut Naalakkersuisunut noqqaassuteqarlutik, 2009-mi aningaasanut inatsimmi konto 10.06.10 aallaavigalugu partiinut tapiissutissanik immikkoortitsisoqaqqullugu. Ataatsimiititaliap isumaliutissiissutaani allaqqavoq:

”Tamanna tunngavigalugu pingajussaaneerinissamut allannguutissatut siunnersuummik saqqummiusseqqullugit Naalakkersuisut amerlanerussuteqartunit siuliani taaneqartunit qinnuigineqarput, taamaaliornikkut partiit 2013-imi qineqqusaarnissaannut tapiissuteqarnissamut konto pingaarnermi matumani aningaasanik immikkoortitsisoqaqqullugu. Aningaasaliissutit amerlassusissaat partiillu akornanni agguaasseriaasissaq eqqarsaatigalugu aammalu taamaalillugu aningaasaliissutini aningaasanik ukiut tamaasa immikkoortitsisoqaqqullugu Inatsisartut aningaasanut inatsisaanni 2009-meersumi konto pingaarnermut 10.06.10-mut Partiit qineqqusaarnissaannut tapiissutinut tunngasumut, missingersuutinut ilanngussaq allannguutissatut siunnersuummut aallaavigineqassasoq siunnersuutigineqarpoq”

2009-mi aningaasanut inatsimmi konto 10.06.10-mi ima allaqqasoqarpoq:

”Qinersinissaq sioqqullugu naalakkersuinikkut sulinermut peqataanermut aningaasartuutit matussutissaannut aningaasatigut tapiissuteqartoqarsinnaavoq naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat nr. 1, 31. maj 2001-imeersumi § 6 tunngavigalugu. Aalajangersagaq pisussaaffittaqanngilaq, tamanna isumaqarluni partiit, kattusseqatigiit kisimiillutilluunniit qinigassanngortittut qineqqusaarnerminnut tapiissutisinissaminnik inatsisit tunngavigalugit piumasaqaateqarsinnaanngitsut.

Aningaasaliissutit Inatsisartunut qinersinissamut kingusinnerpaamik 2009-mi novembarimi pisussamut atatillugu qineqqusaarnermut tapiissutitut atorneqartussaassapput.”

Soorlu takuneqarsinnaasoq taamaallaat 2009-mi Inatsisartunut qinersinissamut qineqqusaarnermi atugassanik immikkoortitsisoqarsimavoq.

Noqqaassutigineqartoq naapertorlugu Naalakkersuisut allannguutissatut siunnersuummik saqqummiussaqarput (nr. 135).

Aningaasaqarnermut Akileraartarnermullu Ataatsimiititaliami amerlanerussuteqartut isumaliutissiissummi pingajussaaneerlugu suliarineqarnissaanut saqqummiussamini allannguutissatut siunnersuutit Inatsisartuni akuerineqarnissaa inassutigaa.