Sisimiut ilinniagaqarfittut ineriartortittuarnissaa suli siunertaavoq

Ataatsimoorussilluni tusagassiuutitigut oqaaseqaat, Naalakkersuisoq Palle Christiansen aammalu Borgmester Hermann Berthelsen:

Ilinniartitaanermut, Ilisimatusarnermut Nunanullu Avannarlernut Naalakkersuisup aammalu Qeqqata Kommuniani borgmesterip Herman Berthelsen-ip akornanni, ataasinngornermi januarip 14-ani Sisimiut ilinniagaqarfittut siunissaa aammalu Qeqqata Kommuniata ilinniarfeqarnikkut ineriartortinneqartuarnissaat oqaloqatigiissutigineqarsimapput.

Tamatumunnga tunngatillugu Borgmester Hermann Berthelsen-i imatut oqariartuuteqarpoq: ”Nuannaarutigaara Palle Christiansen-imit pulaarneqarsimanera, tamatumani periarfissinneqarsimagama uagut kommunitta ilinniarfitsigut suli ineriartortitsivigineqartuarnissarput oqaloqatigiissutigineqarnissaa. Uagut iliuuseqartuarusuppugut ilinniarfiit pitsaasunik sinaakkutaqarnissaat aammalu ilinniagaqartut ataatsimoorfigisinnaasaanik pilersitsiniassalluta, tamatumani eqqarsaatigaarput Imarsiornermut Ilinniarfiup ilaata Sisimiunut inissinneqarsinnaanerata Naalakkersuisut siunniuffigisimasaat. Uangami isumaqarama Sisimiuni periarfissagissaartugut piniarnermut aalisarnermullu ilinniarfiit maani inissinneqarnissaat aqqutissiuusseqataaffigissallugu”.

Tamatuma saniatigut aamma eqqartorparput Sisimiut teknikkikkut ilinniagaqarfiit eqqarsaatigalugit, illoqarfiup nunatsinni qitiusumik inissisimanerata nalimmassaavigineqartuarnissaa.

Pineqartut pillugit Palle Christiansen-i imaattumik oqariartuuteqarpoq: ”Uannut pingaaruteqarpoq naqissusiivigissallugu Naalakkersuisunit Ilinniartitaanikkut sinaakkutassiissutiginiarneqartut toqqammavigalugit teknikkikkut ilinniarnerit, tamatumani ilanngullugu Saviminilerinermik Ilinniarfiup Sisimiuni inissinneqarlutillu ineriartortinneqarnissaat suleqatigiissitaliornikkut aqqutissiuusseqataaffigissallugu, tamatumuunalu ilinniagaqartut ilinniarfiillu suli pitsaanerusunik sinaakkutassinneqarlutillu piginnaanngorsarfigineqarsinnaanissaat aamma aqqutissiuussiffigissallugit. Uanga nammineerlunga isumaqarpunga nunatsinni periarfissaqarluartugut teknikkikkut piginnaasat ineriartortittuarnissaanut, tamatumani aamma Artek-imi suleqatigiinnerput eqqarsaatigalugu. Taamaattumik tamakku aallaavigalugit ilisimatuussuttitigut ineriartortitsiffiusinnaasut pillugit borgmester-ilu eqqartueqatigiissinnaasimanerput iluarinngitsuunngilara”.

Hermann Bethelsen-ip tamakku imatut ilalerpai: ”Qeqqata Kommunianit iluarisimaarparput, ilumut pilersaaruteqartoqarmat kommunitsinni ilinniarfeqarnikkut suli ineriartortitsisoqarnissaa eqqarsaatigalugu. Soorunalimi aamma neriuutigisimagaluarparput Imarsiornermik Ilinniarfiup tamarmiusup Sisimiunut nuunneqarsinnaanissaa, taamaattorli Saviminilerinermik Ilinniarfiup Sisimiunut nuunneqarnissaa piviusorsiortumik pilersaarutigineqalersimammat, paasilluarsinnaavarput Nuummi qitiusumik Imarsiornermik Ilinniarfik inissikkusunneqarsimammat. Teknikkikkut ilinniarfiup – Tech College-p – tamatumunngalu ilanngullugu Aatsitassanut Ilinniarfiup aamma ineriartortinneqartuarnissaat eqqarsaatigalugit pisariaqartitsisoqartoq oqariartuutigisimavarput. Tamatumani paasivarput, assersuutigalugu Uummannami immikkoortortaqarfiliortoqarniarnera Aatsitassanut Ilinniarfiup ineriartortinneqarneranut sunniuteqarnavianngitsoq, aamma maani suliffissaaleqisut suliffissanut nutaanut piginnaanngorsartinneqartarnissaat eqqarsaatigalugu, tassami kommunini suliffissaaleqisut inuussutissarsiutinut ineriartortinneqartuni suleqataalersinnaanissaat anguniarlugu piginnaanngorsaasoqartariaqarmat”.

Qulaani taaneqartut saniatigut inuusuttut 15-18-nik ukiullit ilinniarnissaminnillu suli aallartitsisinnaasimanngitsut immikkut iliuuseqarfigineqarnissaat, taamatullu ilinniagaqartut inissaqartinneqarnissaat, Maniitsumilu atuartut angerlarsimaffeqarnerannut meeqqallu atuarfiinut tunngasut ataatsimiinnermi eqqartuiffigineqarput.