Ingerlatseqatigiiffinnik aqutsilluarnissamut najoqqutassiat

Namminersorlutik Oqartussanit pigineqartunik ingerlatseqatigiiffinnik aqutsilluarnissamut najoqqutassiat saqqummiunneqarnerat

Naalakkersuisut piginnittuunermut politikkerisamik ilaattut aktiaateqarluni ingerlatse-qatigiiffinnut 100 procentimik Namminersorlutik Oqartussanit pigineqartunik ingerlatseqatigiiffinnik aqutsilluarnissamut najoqqutassiorsimapput.

Najoqqutassiat qulakkeerinneqataassapput, aktiaateqarluni ingerlatseqatigiiffinnik Namminersorlutik Oqartussanit pigineqartunik sulianik pikkorissuseqarluni siulersorneqarnissaq aammalu periusissiatut sinaakkutissat piginnittumit aalajangersarneqarsimasut naapertorlugit. Sulianik pikkorissuseqarluni ingerlatsinerup qulakkiissavaa ingerlatseqatigiiffik piginnittorlu pitsaanerpaamik isumannaarsor-neqarsimassasut aningaasaqarnikkut annaasassanut, taamatummi oqaluttuarisaanermi aktiaateqarluni ingerlatseqatigiiffiit ilaat Namminersorlutik Oqartussanit pigineqartut eqqorneqartarsimammata. Peqatigitillugu sulianik pikkorissuseqarluni ingerlatsinerup tunisassiornermi ineriartornermik aamma inuiaqatigiinni suliffissanik pilersitsissaaq.

Namminersorlutik Oqartussanit aktiaateqarluni ingerlatseqatigiiffinnik pigineqartunik najoqqutassiaq aamma ingerlatseqatigiiffinnut børsimi allattuiffinni nalu-naarsorneqarsimasunut kaammattuutit akornanni annertuunik naapertuuttoqarsi-massaaq, tassami kaammattuutit ilarpassui amerlasuut oqaatiginnittuummata ingerla-tseqatigiiffinnik ingerlatsinermut nalinginnaasumik peqqinnartumik periuseqarnermut.

Najoqqutassiat ingerlatseqatigiiffinni ataasiakkaani siulersuinermi ammanerusoqarnis-saanik pilersitsissapput, taamaasilluni inuiaqatigiinni tusatsiakkat naapertorlugit oqallittarneq annikillisinneqarsinnaalluni. Taamaattumik ingerlatseqatigiiffiit ukiumut ataasiarlutik tamanut saqqummiuttarniarpaat ingerlatseqatigiiffiup najoqqutassiani kaammattuutigisanit suliaqarnerminni tamakkiisumik takussutissiaq namminneq nittartakkamikkut.

Kuupik V. Kleist oqaaseqaateqarpoq: ”Naalakkersuisut naalakkersuisooqatigiinnermik isumaqatigiissumminni neriorsuutiginikuugaat anguniagaqartumik sulissutiginiarlugu siulersuisut sulianik pikkorissuseqartumik ingerlatsisalernissaat aamma Naalakkersuisut piginnittuunermik inissisimanerminnik namminneerlutik suliarinninnissaat. Najoqqutassiat taamatut ineriartornermut Naalakkersuisullu siulersuisunut qullersaqarfinnullu isumalluarnerat pillugu ammanerusumik ingerlatsinermik ikorfartuutaapput.”

Najoqqutassiat Namminersorlutik Oqartussanit ingerlatseqatigiiffinni pigineqartunit suleqatigiissitaq suleqatigalugu suliarineqarput makkuninnga inuttaqartunit, Karin Egede (VIsit Greenland A/S), Pernille Fabricius (Royal Greenland A/S), Mikkili Skourup (KNI A/S) aamma Jens Andersen (Royal Arctic Line A/S).

Uani aamma nassaarineqarsinnaapput: http://www.nanoq.gl/Emner/Landsstyre/Departementer/Landsstyreformandens%20Departement/bestyrelsessekretariatet/Selskabspolitik/Retningslinjer_for_god_selskabsledelse.aspx