Danmarkimik annertunerusumik suleqateqarneq

Aatsitassalerinermi akileraartarnermut tunngasutigut Danmarkimik annertunerusumik suleqateqarneq.

Aningaasaqarnermut Naalakkersuisup, Maliina Abelsenip, danskit Aningaasaqarnermut Naalakkersuisuat, Bjarne Corydon aamma Akileraartarnermut ministeri Holger K. Nielsen, annertunerusumik suleqatigiinnissaq pillugu ullumi ataatsimeeqatigai.

Kalaallit Nunaata Danmarkillu akornanni suliffeqarfissuarnut nunanit tamalaaneersunut, taakkununnga ilanngullugit suliffeqarfissuit aatsitassarsiornermik ingerlataqartut, akileraartarnermut tunngassuteqartut pillugit annertunerusumik suleqatigiissutiginissaannut periarfissat ataatsimiinnermi immikkut ittumik eqqartorneqarput.

”Malittarisassat pigisatta aamma suliffeqarfissuit nunanit tamalaaneersut pitsaalluinnartuunissaat qulakkeerniarlugit, nunani tamalaani attaveqaatitta atornissaat pingaaruteqarpoq. Tassunga atatillugu Danmarki aallartiffigissallugu pitsaasuuvoq, danskillu naalakkersuisui pisariaqartitsinerput aallaavigalugu ikiuutissallutik kissaatigaat.

Kalaallit Nunaata aatsitassarsiornermi aningaasatigut pissarsissuteqarnissaa qulakkeerniarlugu, immikkut ilisimasallit suleqatigiissussat pilersinneqartussat ilanngullugit, nunanit tamalaanit ikiorneqarnissatta tungaatigut inissisimalluarpugut”, Maliina Abelsen naqissusiivoq.

Taassuma saniatigut suliniutit angisuut pillugit inatsisip danskillu malitseqartitsilluni inatsisaata killiffiat eqqartorneqarput.