SIK-mik akissarsiarsiat pillugit isumaqatigiissuteqartoqarpoq

SIK-mik akissarsiarsiat pillugit isumaqatigiissuteqartoqarpoq: Isumaginninnikkut aningaasaateqarfik nutaaq aqqutigalugu ilaqutariinni napparsimasoqartillugu tapiissuteqartoqarsinnaanngorpoq.

SIK aamma Namminersorlutik Oqartussat kiisalu kommunit akornanni akissarsiat pillugit isumaqatigiissutissaq 7. januar isumaqatigiissutigineqarpoq. Isumaqatigiissut nutaaq aqqutigalugu SIK-mi atorfillit ilaqutaminnik qaniginerpaasaminnik nappartsimasoqatillugu tapiiffigineqarsinnaanissaat qulakkeerneqarpoq. Tamanna pissaaq isumaginninnikkut aningaasaateqarfimmik pilersitsisoqarneratigut, taannalu aqqutigalugu SIK-mi ilaasortat ilaqutaminnik qaniginerpaasaminnik napparsimalersoqartillugu najuusinnaanissaminnut periarfissaqalissapput.


Jess G Berthelsen oqarpoq: ”Angusaasoq ilaasortakka sinnerlugit naammasigisimaarpara, tassuunakkumi takutinneqarmat inuiaqatigiinni nammaqatigiinnerusumik atugassaqartitsineq”

Aningaasaqarnermut Naalakkersuisoq Maliina Abelsen angusaasuttaaq nammagisimaarpai. Maliina Abelsen oqarpoq: ”SIK-ilu peqatigiilluni akisussaassuseqarneq ersersipparput. Atukkatigut pitsanngoriartitsivinnissaq isumaqatigiissutit aqqutigalugit qulakkeerneqarpoq, tassuunakkummi inuit ajornartorsiuteqarlutik inissisimasut ikiorserneqarsinnaalissammata, tamannalu pingaartitalerilluinnarpara.”


Martha Abelsen, KANUKOKA-mi siulittaasoq Jess G Berthelsen aamma Maliina Abelsenitulli angusaasut nuannaarutigai. Martha Abelsen oqarpoq: ”Isumaqatigiissuteqarpugut kikkulluunniit nunatsinni sumiikkaluarunilluunniit ilaqutaminnik napparsimasoqartillugu najuusinnaanissaat qulaakkeerneqarluni. Nutaarsiassaavormi SIK-mi ilaasortat nunatsinni angalasinnaanerinut tapiissuteqartalerneq.”


Akissarsiat pillugit isumaqatigiissut ukiuni marlunni atuutissaaq isumaqatigiissutigineqarluni akissarsiat tamarmiusut 4,05 pct-imik qaffanneqarnissaat. Isumaqatigiissutigineartut iluanniippoq isumaginninnikkut aningaasaateqarfimmut aningaasaliissutissat.


Isumaqatigiissutigineqartut atuutsilersinneqartinnagit illuatungeriit tunuliaqutaannit akuerineqaqqqaartussaasapput.



Martha Abelsen
KANUKOKA-p Siulittaasua
Oqa. 36 21 01

Jess G. Berthelsen
SIK-p Siulittaasua
Oqa. 55 88 15 Maliina Abelsen

Maliina Abelsen
Aningaasaqarnermut Naalakkersuisoq
Oqa. 34 50 00