Piniarnermut Aalisarnermut Ilinniarfik

Ilinniartitaanermut, Ilisimatusarnermut Nunanullu Avannarlernut suleqatigiinnermut Naalakkersuisoq Palle Christiansen aamma borgmester Jess Svane Qaasuitsup Kommunialu sinnerlugu kommunalbestyrelsimi ilaasortat sisamanngornermi ulloq 10. januar 2013 ataatsimiipput.

Oqaluuserineqartut tassaapput Piniarnermut Aalisarnermullu Ilinniarfik aamma Uummannami atuartut inaat.

Isumaqatigiissutigineqarpoq Uummannami pikkorissarfimmik pilersitsinissaq qinnuteqaatigineqassasoq, taamaalilluni Uummannami ilinniarnissamut periarfissanik nutaanik sinaakkusiisoqassalluni. Tamakkiisumik aaqqiinissaq sulissutigineqarpoq, tassani allamut ilinniagaqarneq, piginnaasanik annertusaaneq kiisalu aatsitassarsiornermik pikkorissaasoqassalluni.

Aammattaaq assigiinngitsunik periarfissalimmik pilersitsisoqarsinnaavoq, assersuutigalugu Uummannami meeqqanut inuusuttunullu sunngiffimmi sammisassaqarfimmik.

Qaasuitsup Kommunianit aamma Ilinniartitaanermut, Ilisimatusarnermut Nunanullu Avannerlernut suleqateqarnermut Naalakkersuisumit Palle Christiansenimit kissaatigineqarpoq inuussutissarsiutini ineriartorfiusuni ilinniartitsinissaq siunissami isiginiarneqassasoq.

Avataani pikkorissarnernik pilertsineq, tassani kalaallit innuttaasut aatsitassarsiornermut ilinniarnissamut ilinniaqqissinnaallutik, periarfissaalluarpoq.

”Ataatsimut taamatut aaqqiinermi suliffeqalernissamut ilinniartitaanissaq qulakkeerneqassaaq, taassumalu saniatigut nunaqavissut sapinngisamik amerlanerpaat suliniuteqarfiginerisa annertusarneratigut aatatsitassarsiornermi inuussutissarsiutaalersussami ineriartorfiusumi suliffeqalernissamut pisariaqartunik piginnaasaqarnissaq qulakkeerneqassaaq, tamannalu piareersimaffigissavarput”, Naalakkersuisoq Palle Christiansen oqarpoq.

Atuartut inaat nuunneqassaaq.
Hotel Uummannaq meeqqat atuarfianni angajullernut Uummannami atuartunut inissanngortinneqassaaq Atuartut Inaanni ineqartut siunissami 50-iusinnaalissapput.

Atuartut inaat aaqqissuunneqareeruni kommunimi sumiiffinnit allanersuunnik tigusisinnaalissaaq.

Ataatsimiinnermi tamanit isumaqatigiissutigineqarpoq atuartut maannakkut atuartut inaanniit piaarnerpaamik nuussasut, ininullu nutaanut piareerniariarpata nuussallutik.

Tamassumunnga pissutaavoq illuatungeriit isumaqatigiissutigimmassuk maannakkut atuartut inigisaat atuartunut sulisunullu inigissallugu naleqqutinnginnerat.

”Maannakkut atuartut inaat inigissallugu naleqqutinngilaq, aammalu atuartut sulisullu atuartut inaanniit atuartut inaanniit piaarnerpaamik nuunneqassapput, taamaalillutik atuartut initoqaanni oqunnik suerfimmillu timimikkut ajoquserniassanngimmata.

Atuartut timimikkut ilorrisimaarnissaat pingaarteqarput, nuannaarutigaarpullu suliami uani kiisami pisoqarnera” borgmester Jess Svane oqarpoq.

Aammattaq illunik iluarsaassineq naleqqussaanerlu Qaasuitsup Kommuniata Naalakkersuisullu suleqatigiinnerisigut sapinngisamik siuarsarneqassasoq.

Ingerlatsiveqarfinnit suliamut attuumassuteqartunit tamanit pisariaqartitanik ataqatigiissaarisussamik piaarnerpaamik suleqatigiissitaliortoqassaaq.