Suleqatigiit immikkut ilisimasallit inissipput

Aatsitassat akileraarusersorneqarnissaannut suleqatigiit immikkut ilisimasallit inissipput. Suleqatigiit immikkut ilisimasallit arlaannaannulluunnit attuumassuteqanngitsut Naalakkersuisunut Kalaallit Nunaanni aatsitassarsiornikkut periusissamik siunnersuisussat suliassaasa nassuiaatissaat Naalakkersuisut ullumi akuersissutigaat.

Periusissiat aatsitassanut uuliamullu maanna atorneqartut 2009-mi atuutilersinneqarput, tassani naalagaaffiup Namminersornerullutillu Oqartussat goverment takemut ilutsit atuutilersinneqannginnerini misissorluarneqarsimallutik.

Suleqatigiinnik immikkut ilisimasalinnik pilersitsinermi siunertaavoq aatsitassanut, uuliamut taamatullu erngup nukinganut tunngassutilinnut periusissianik 2015-imit atuutilersussanik arlaannaanulluunnit attuumassuteqanngitsumik siunnersortinnissaq.

Suleqatigiit immikkut ilisimasallit marlunnik suliassaqassapput.

Siullertut suleqatigiit immikkut ilisimasallit maanna suliffeqarfinnut akileraartarnermut inatsisaasut misissuiffigissavaat naliliivigalugillu, suliffeqarfiit aatsitassanik suliaqartut akileraartarneranni Kaalaallit Nunaata akileraarutitigut isertitsinissaanut inatsisitigut qularnaarilluarnissaa anguniarlugu. Taamatuttaaq suleqatigiit akileraartarnermi nakkutilliineq, suliffeqarfiit eqqortumik akileraartarnissaannik qularnaarisussaq naliliivigalugulu innersuussuteqarfigissavaat. Suliassamut tassunga suleqatigiit innersuussinerat kingusinnerpaamik apriilip aallaqqaataani 2014 piareereersimassaaq.

Aappaattut suleqatigiit immikkut ilisimasallit siunissami aatsitassanut, kulbrintimut erngullu nukissiuteqarnikkut akileraarusersuinissamut periusissiamik innersuussuteqassapput. Periusissiami uani misissuinissamut akuersissutaareersimasut ataqqineqassapput, taamatullu Kalaallit Nunaata nunarsuarmi unammilleqatigiinnermi pitsaasumik atugassaqarnissaa qulakkiissallugu. Suliassamut tassunga suleqatigiit innersuussinerat kingusinnerpaamik juulip aallaqqaataani 2014 piareereersimassaaq.

Suleqatigiit immikkut ilisimasallit sulinerat demokraatiskiusumik ingerlanneqarnissaa qulakkeerniarlugu Naalakkersuisut aalajangiuppaat, politikkikkut malinnaasussamik suleqatigiissitaliortoqassasoq partiinit Inatsisartunit ilaasortaatitalinnit tamanit inuttaqartinneqartumik. Taamatuttaaq aatsitassarsiornermi suliaqartunik innuttaasullu sinniisuinik tusarniaanissat piareersaasiorneqassapput.

Suleqatigiit immikkut ilisimasallit siulittaasussaattut Naalakkersuisut toqqarpaat Professor Torben M. Andersen. Torben M. Andersen Aningaasaqarnermut Siunnersuisoqatigiinni siulittaasuuvoq Akileraartarnermi Atugarissaarnermilu Ataatsimiititaliamilu suliaqarnermigut Kalaallit Nunaata aningaasaqarneranut ilisimasaqarluarluni.

Suleqatigiit immikkut ilisimasallit inuttalerneqassapput nunarsuarmi akileraarusersuinikkut ilisimasalinnit, immikkullu uuliamut aatsitassanullu suliaqarnermi ilisimasaqartuusunit.