Bootcamp 2013

2013-imi bootcamp-ip siulliup suliariumannittussarsiuunneqarnera maani najugaqartunit ajugaassutigineqarpoq.

Nuummi februari qaammat bootcamp-ip aallartittussap suliariumannittussarsiuunneqarnera naammassivoq. Suliariumannittussarsiuussinermi ajugaasuupput Motzfeldt og Grødem I/S, kalaallit ingerlatseqatigiiffiat nutaaq maanna isumaqatigiissuteqarfigineqareersoq.

Bootcamp maanna ingerlanneqartussanngortoq pillugu Naalakkersuisoq Palle Christiansen imatut oqaaseqarpoq. ”Assut nuannaarutigaara bootcamp-eqartitsineq iluatilluarsimasoq maanna ingerlateqqissinnaangoratsigu, inuusuttunut ilinniartitaanerup avataani inissisimasunut iluaqutaasussamik. Bootcamp-i siulleq misiligutitut ingerlassimasarput iluatilluarsimavoq. Tamatumunngalu atatillugu assut iluarisimaarpara kalaallit suliffeqarfiutaat maanna suliariumannittussarsiuussinermi naammasseqqammersumi bootcamp-ip tulliup ingerlannissaanut pitsaanerpaanik neqerooruteqarmat.”

Nuummi bootcamp 2013-imi ingerlanneqartussatut naatsorsuutigineqartut marluusut siullersaraat. Siunertaavoq 2013-imi bootcamp-ip aappaa Nuup avataani ingerlanneqassasoq, naak sumiiffissaa suli aalajangiunneqanngikkaluartoq. Bootcamp-imi ingerlanneqartussami 25-inik peqataasoqassaaq.