Tasiilami illu ornittagaq Amarngivat

 

Amarngivat tassaavoq Tasiilami illu assigiinngitsunik atuuffilik. Meeqqanut tallimaniit 14-inut ukiulinnut ornittakkatut, atualersussanullu sungiusarfittut atuunnermi saniatigut arnanut qitornartaarlaanut isumassuinermut pikkorissaanernullu aamma atorneqartarpoq. Amarngivat ajornartoornermi aamma unnuiffiusinnaasoq atisanik atoriikkanik akikitsunillu tuniniaaffeqarpoq. Tusagassiivimmeersup Else Olsvigip Amarngivamut pulaarnermini Amarngivap pisortaa Lars Gøransson Illup Tasiilamut nunaqarfiinullu pingaarutai pillugit oqaluttuartippaa.

Lars Gøransson:- Katillugit pingasunik illuuteqarpugut, Tasiilami, Kulusummi Kuummiunilu. Illut taakkua pingasut meeqqanit katillugit 100-it missaanniittunit ullormut iserneqartarput.

Amarngivat Tasiilap illoqarfiani ersarissorujussuuvoq, qaamasunik qalipaatigissaartuugami nutarpasillunilu.

Lars Gøransson:- Aap, illu kommuunip illuutigaa, kisianni illumik aserfallatsaalineq aqutsinerlu uagut nammineerluta akisussaaffigaarput. Illu ukiuni arfineq marluk qaangiuttullu kiisami qalipatsipparput, qalipaatit meeqqat nuannarisaat atorlugit.

Amarngivat assigiinngitsunik atuuffeqarpoq.

Lars Gøransson:- Illu manna Tasiilamiittoq silatimini marlunnik pinnguartarfittaqarpoq. Katillugit arfinnilinnik sulisoqarpugut, uangalu allaffimmiinnerusarpunga, allaffissornikkut aqutsinikkut aningaasaqarnermullu tunngasunik suliaqarnerusarlunga. Illup sapaatip akunnerata ulluini tamani ammasarnissaa pisariaqartikkaluarparput aningaasaqarniarnerpulli pissutigalugu sapaatip akunnerisa naaneri minillugit ammasarpugut. Taamaattoq ilaannikkut sapaatip akunnerisa naanerini ajornartoornermi unnuiffittut atuussinnaasarpugut.

Illu arlalinnik ineqarpoq, minnerusunik anginerusunillu.

Lars Gøransson:- Immikkoortunut assigiinngitsunut agguataarnikuuarput, soorlu TV-mik isiginnaartarfik, ini eqqissisimanerusumik sammisaqarfiusinnaasoq inilu alla pinnguarfiusinnaasoq. Qaliat ilaaniippoq atisanik atornikuerniarfipput illoqarfimmiunit assut nuannarineqartoq atorluarneqartorlu. Tuniniakkavut akikitsuarannguummata iluanaarutaavallaanngikkaluarlutik taamaattoq isertitaqaatinut ilaapput.

Amarngivat imminut ingerlattussatut aaqqissuussaasoq Namminersorlutik Oqartussanit kommunimillu aningaasaliiffigineqartarpoq. Tamakkua saniatigut illua avataaneersunit tunissutitut aningaasaliiffigineqartarpoq aammalu aningaasaliisartunut qinnuteqartarluni, ukiulli tallimat kingulliit aningaasaliisartut illumik ingerlatsinermut atugassanik aningaasaliissaajusammata, taava nammineerlutik isertitsissutigisinnaasaminnik nassaartortariaqarsimallutik Lars Gøransson oqarpoq.

Aningaasaqarniarneq naammattusaarnaraluartoq taamaattoq Amarngivat ukiumut arlalinnik meeqqanut iluaqutaasunik suliaqartarpoq.

Lars Gøransson:- Ukiut tamaasa aningaasaliisartunit pissarsiatta ilaat meeqqanut pisariaqartitsisunut nunanut allanut tikeraartitsinernut atortarpagut. Meeqqanik pisariaqaritsisunik angalaaqateqaraangatta sapinngisamik Islandimut aqqusaarniartarpugut, tassani meeqqat soorlu nalunnermut ilinniartittaratsigit. Angalaqatigiittarnerit sulisut meeqqallu imminnut qaninnerulernerannik nassataqartarmata iluaqutaasaqaat.

Amarngivat Kulusumi Kuummiunilu immikkoortortaqarpoq assut atorluarneqartunik. Atorluarneqaqimmata inissarlu killeqarmat meeqqat ukioqatigiikkaarlugit ilaatigut ullormut aalajangersimasunik piffissalerlugit isersimaartinneqartarput.

Amarngivat Tasiilap illoqarfiannut assut pingaaruteqartoq Lars Gøransson naliliivoq:

-Illoqarfitta meeqqanut 15-it tikillugit ukiulinnut angerlarsimaffiup avataani sammissassatigut tunniussinnaasai killeqartorujussuupput, taamaammallu Amarngivat atorluarneqarpoq. Meeqqat saniatigut naartusut anaananngorlaallu ernisussiortumit peqqissaasumillu maani aamma pikkorissarneqartarput oqaloqatigineqartarlutillu. Illup ilaani ataatsimiittarfik imigassamik ajornartorsiuteqartunut katsorsaqatigiittunut kiisalu inuttut ajornartorsiutilinnut imminornissamillu eqqarsaateqartartunut oqaloqatigiittarfittut aamma atorneqartarpoq.