Nunani tamalaani suliniutinut tapiissutit

Nunanut Allanut Pisortaqarfimmit aningaasat immikkoortitat aqunneqarput siunertaralugu Kalaallit Nunaanni aamma nunani tamalaani kattuffiit, ataatsimoorussallit, suliffeqarfiit assigiinngitsut inuilluunniit ataasiakkaat tapersersussallugit suliniutinik, suleqatigiissutigineqarsinnaasunik ineriartortitserusuttut imaluunniit allanut atatillugu peqataarusuttut Naalakkersuisut nunanut allanut tunngasutigut naalakkersuinikkut pingaarnersiuinerinut pingaarutilinnut.

Angalanernut imaluunniit pikkorissartitsinernut, isumasioqatigiissitsinernut, saqqummersitsinernut, ataatsimiinnernut suliniutinut allanullu peqataanissamut tapiiffigineqarumalluni qinnuteqartoqarsinnaavoq. Taamatuttaaq Kalaallit Nunaanni nunat tamalaat kulturikkut saqqummersitsinerinut tapiiffigineqarumalluni qinnuteqartoqarsinnaavoq soorluttaaq tusagassiortut sulinerat tapiiffigineqarsinnaasoq.

Nalinginnaasumik tapiiffigineqarneq ajorput ullormusiat imaluunniit isertitanit aningaasaqarnikkut ikiorserneqarneq assigisaanilluunniit.

Ataatsimut isigalugu qinnuteqaatit Kalaallit Nunaata nunani tamalaani inissisimaneranut attuumassuteqassapput.

Qinnuteqaatini makku taaneqarsimassapput:

  • Qinnuteqaateqartup aqqa, tlf. nr. najugarfialu
  • Suliassat/suliniutip allaaserineqarnerat
  • Suliassatigut/suliniutikkut siunertat
  • Naalakkersuisut nunanut allanut tunngasutigut naalakkersuinikkut pingaarnersiuinerinut attuumassuteqarnerat (Nunat allanut tunngasutigut naalakkersuinikkut ingerlatsinermi iliuusissaq)
  • Pilersaarutit qaaqqusissullu, pisariaqassappat
  • Missingersuutit immikkoortortalersukkat
  • Aningaasat qinnutigineqartut

Qinnuteqaateqartoq Nunanut Allanut Pisortaqarfimmut nalunaarusiamik allagaqassaaq suliarineqartut pineqartut kingunitsiannguatigut naatsorsuutinik inaarsariikkamik taamatullu angusarineqartut allaaserineqarnerinik imalimmik. Taamatuttaaq suliassat/suliniutip pereernerata kingorna qinnuteqaateqartoq akilikkanut uppernarsaatit, akiligassat allagartaat allallu Nunanut Allanut Pisortaqarfimmut nassiussavai.

Ilinniagaqarnermut tunngatillugu suliniutinut qinnuteqartut minnerpaamik kandidatitut qaffasissusilimmiissapput. Tamakku saniatigut Nunanut Allanut Pisortaqarfik imminut piginnaatippoq toqqarlugit naliliinerit tunngavigalugit qinnuteqartunut itigartitsisarnissaminut taamatullu ukiuni aningaasanut inatsiseqarfiusumi pineqartumit tapiissuteqartoqareersimasaraangat, taamaaliornikkut isumannaarniarlugu aningaasat tapinngisamik annertunerpaamik tamatigoortumik atorneqarnissaat, soorluttaaq Nunanut Allanut Pisortaqarfik imminut piginnaatittoq qinnutigineqartunit ikinnerusunik aningaasaliisarnissaminut.

Qinnuteqaateqarnissamut piffissaliussaq

Nunanut Allanut Pisortaqarfik ingerlaavartumik qinnuteqaatinik tigooraavoq tapiissuteqartoqarsinnaasarporlu aningaasaliissutinik atugassaqartoqarallartillugu.