Kalaallit Nunaannukarneq aamma Kalaallit Nunaanniinneq

Nunani allamiut Schengenlandimi allami najugaqarnissamut aamma uterlutik angalanissaminnut akuersissutinik pissarsisimasut Danmarkimut isernissaminnut visummeqartariaqanngillat. Schengenlandimut allamut najugaqarsinnaanissamut akuersissuteqarluni iserneq pillugu annertunerusumik atuagaqarit. Najugaqarsinnaanermut akuersissutit taakku Savalimmiunut aamma Kalaallit Nunaannut isernissamut piginnaatitsinngillat.

Schengenlandimiit allamit akuersissuteqarluni iserneq
Nunani allamiut Schengenlandit ilaanni najugaqarnissaminnut akuersissutinik pissarsisimasut Danmarkimut isernissamut visummeqartariaqanngillat. Nunani allamiunut Schengenlandininit allaniit sivisunerusumik najugaqarnissamut visummimik (D-visummi) pissarsisimasunut tamanna aamma atuuppoq.

Najugaqarnissamut akuersissut Danmarkimut Schengenlandinulluunniit allanut isernissamut piginnaatitsinersoq isumannaarniaraanni nunami najugaqarnissamut akuersissuteqartumi ajunnginnersoq misissorneqarsinnaavoq.
Nunani allamiunut oqartussaasuniit najugaqarnissamut akuersissutit tamarmik sivisunerusumik najugaqarnissamut visumminngorlugit (D-visummi) atulersinneqartartut imaluunniit nunamiikkallarnissamut allagartat Danmarkimi atuuttut, Danmarkimut isernissamut Danmarkimiikkallarnissamulluunniit Schengenlandinini allani aamma atuupput. Najugaqarnissamut akuersissutit taamaallaat Kalaallit Nunaanni Savalimmiunilu atuuttussat Schengenlandinut allanut isernissamut atuutinngillat.

Danmarkimiinnissamut Schengenlandinulluunniit allanut isernissamut najugaqarnissamullu piumasaqaataasut allat eqquutsitsinersut nammineq isumaginissaat akisussaaffigineqassapput.

Visummimik pissarsinissamut piumasaqaatit
Visummimik pissarsinissamut piumasaqaatit nalinginnaasumik eqquutsinneqarsimasussat ataani allattorsimapput:

Visummip ullormi atorunnaarfissaata aamma ukiut qulit sinnerlugit tunniunneqarsimasussaannginnerata saniatigut nammineq passerisaq imaluunniit angalasinnaanermut uppernarsaat alla qaammatini pingasuni atuuttuussaaq.

• Najugaqarnerup angerlamullu angalanissap akilernissaanut naammattunik aningaasaateqartoqartariaqarpoq. Qanoq amerlatigisunik naammattunik aningaasaateqartariaqarneq aallartitaqarfiup aalajangersartarpaa najugaqarnerullu sivisussusia apeqqutaasarpoq aammattaaq assersuutigalugu akunnittarfimmiissanerluni, nammineerluni ilaquttaniissanerluni kammalaatiniluunniit najugaqarnissaq apeqqutaasarput. Aallaavittut ullormut 350 kr.-it missaani aningaasaatigineqartoqartariaqarpoq aamma nammineq illusimanermi inissisimatitsisup aningaasartuutit tamaasa akisussaaffigippagit ikinnerusinnaapput. Akunnittarfimmiinniaraanni aningaasatit amerlanerusariaqarput, ullormut 500 kr. missaanni.

• Peqqissutsikkut toqusoqarnikkulluunniit tunngasunik peqquteqartunik, kinguartinneqarsinnaanngitsunik nakorsanit katsorsarneqarneq, tassanngaannartumik napparsimmavimmi katsorsartinneq najugaqarnerup nalaani matusiissutaasinnaasumik angalanermi napparsimalersinnaanermut sillimmasersimasoqassaaq. Angalanermi napparsimalersinnaanermut sillimmasiineq Schengenlandini tamani atuutissaaq, ikinnerpaamillu sillimmasiinikkut matussusiiffissaq 30.000 euro-ssalluni. Visummip atuuffiani tamarmi angalanermi napparsimalersinnaanermut sillimmasiineq atuutissaaq. Piffissami tamarmi angalanermi napparsimalersinnaanermut sillimmasiineq atuutinngippat visummi sivikillineqarsinnaavoq.

• Schengenip paasissutissiinermik katersuiffianut kissaatigineqanngitsutut nalunaarneqarsimasussaanngilaq (SIS II).

• Anisitaanikuusimassasoqassanngilaq Danmarkimullu iseqqusaanngitsuussanani.

• FN-ip EU-lluunnitit pineqaatissinneqarsimasut allattorsimaffianneeqqusaasoqanngilaq.

Piumasaqaatit makku visummimik atuutilersitsinermi Schengenlandinullu isernermut aamma najugaqarnermut atuupput. Taamaammat najugaqarnermut angerlamullu angalanermut naammattunik aningaasaateqarneq kiisalu angalanermi napparsimalersinnaanermut sillimmasiineq atuuttoq uppernarsarneqarsinnaajuaannarneqassaaq. Taamaattoqanngippat visummi atorunnaarsinneqassaaq taamaatinneqarlunilu, piaartumillu Schengenlandiniit anilluni aallartoqassalluni.

Nunani allamiunut oqartussaasut nalilerpassuk unioqqutitsilluni Danmarkimi aalajangersimasumik najugaqartoqartoq sivisunerusumilluunniit Danmarkimiittoqartoq imaluunniit isumannaallisaanermut navianartorsiortitsisoqartoq taava visummimut qinnuteqaat itigartinneqassaaq.

Visummip piffissamut atuuffia qaangerneqarpat imaluunniit najugaqarnissamut visummi atorlugu sivisunerusumik ataavartumilluunniit Danmarkimiissutigeriaraluaraanni ukiunik 3-5-nik sivisussusilimmik akuerisaasinnaajunnaartoqassaaq. Akuerisaasinnaanngiffimmi Danmarkimukarnissamut visummimik pissarsisoqarsinnaanngilaq. Visummimik atornerluineq pillugu annertunerusumik atuagaqarit.

Niuernermut tunngatillugu tikeraarneq, inuinnarnut takornariatullu tikeraarneq kiisalu kulturikkut tunngassutilimmik tikeraarneq pillugit annertunerusumik atuagaqarit.

Visummeqarani Danmarkimut isernissamut akuersissutit aalajangersimasut suuneri takukkit (ilanngussaq 2 visummimut atuagaq najoqqutassaq)

Najugaqarnermut akuersissuteqarluni imaluunniit sivisunerusumik Schengenlandimi allamiissutissaq visummi (D-visummi) tunngavigalugu Danmarkimiissimagaanni najugaqarneq taanna piffissamut ullunut 180-iusunut ullut 90-it ilanngullugit naatsorsorneqassanngillat, visummeqarluni visummeqaraniluunniit Danmarkimiittoqarsinnaavoq.