Aaqqissuussaaneq

Danskit naalakkersuisui nunanut allanut sillimaniarnermullu politikkimut oqartussaassuseqaraluartut, 1994-imiilli Kalaallit Nunaani nunanut allanut allaffeqarfeqalernikuuvoq. Tassanngaanniit nunanut allanut allaffeqarfik oqartussaaffigisaminni Naalakkersuisut politikkiat isumagisarsimavaa sulianillu Immikkoortortaqarfiit nunani tamalaani suliniutaasa ilaat ataqatigiissaartarlugit ingerlattarlugillu.

2004-mi nunanut allanut politikkikkut soqutigineqarnerup annertusiartuinnarnera pissutigalugu nunanut allanut kiffartuussineq nutarterneqassasoq kissaatigineqarsimavoq. Taamaattumillu nunanut allanut allaffeqarfik 1. januar 2004 aallarnerfigalugu "Nunanut Allanut Pisortaqarfik"-mmik taaguuserneqarpoq. Nutaamik taaguuserneqarneraniit Namminersornerullutik Oqartussaasimasut kissaatigaat nunanut allanut sillimaniarnikkullu politikkit allat akisussaaffigisartakkat naligalugit pingaaruteqartiginissaat. Juunip qulingani 2009-mi Naalakkersuisut Siulittaasuata Naalakkersuisut nutaat ilisaritippai. Nutaanik Naalakkersuisoqalerneratigut nunanut allanut oqartussaaffik suli pingaaruteqarnerulerpoq, Nunanut Allanut Pisortaqarfiugaluaq aaqqissuussaanikkut Siulittaasup Naalakkersuisoqarfianut nuutsinneqarmat. Tamatuma saniatigut nunanik avannarlernik suleqateqarneq aamma pingaartinneqarnerulerpoq. Tamanna Ilinniartitaanermut, Ilisimatusarnermut Nunanullu Avannarlernut Suleqatigiinnermut Naalakkersuisup oqartussaaffigisaaniippoq, suliassalli Ilinniartitaanermut, Ilisimatusarnermut Nunanullu Avannarlernut Suleqatigiinnermut Naalakkersuisumit kiffartuussilluni isumagineqartussat suli Nunanut Allanut Immikkoortortaqarfimmiipput.

Nuummi allaffiup saniatigut nunanut allanut ingerlatsivik tassaavoq Bruxellesimi Sinniisoqarfik aamma Københavnimi Kalaallit Sinniisoqarfianni sulisut arlallit.