Naalakkersuisut nunanut allanut tunngasunut politikkikkut pisinnaatitaaffii

Danskit Naalakkersuisuisa suli nunanut allanut aamma isumannaallisaanikkut politikkit pillugit oqartussaaffigaat. Taamaattorli Naalakkersuisut arlalinnik pisinnaatitaaffeqarput, nunanut allanut tunngassutilinnut suliani Kalaallit Nunaat attuumassuteqartillugu.

Namminersorlutik Oqartussaanerup 21. juni 2009-mi eqqunneqarnerani, Namminersornerullutik Oqartussaqarneq pillugu inatsit aamma Piginnaatitsinermut inatsit taarserneqarput, Namminersorlutik Oqartussaqarneq pillugu inatsimmit maannakkut atuuttumit. Tamatuma kingornatigut Namminersorlutik Oqartussaanermi nunanut allanut politikkikkut oqartussaaffeqarneq Tunngaviusumik inatsimmit, Namminersorlutik Oqartussaqarneq pillugu inatsimmit aamma ileqqutigut naleqqussarneqalerput.

Inatsisitigut killiliussat pillugit sukumiinerusumik paasisaqarit.

Namminersorlutik Oqartussat iluani Naalakkersuisut - Nunanut Allanut Immikkoortortaqarfiup ataanni - illuatungaanilu Inatsisartuni Nunanut Allanut Tunngasutigut Sillimaniarnermullu Ataatsimiititaliap iluani erseqqilluinnartumik akisussaaffik avinneqarnikuuvoq. Naalakkersuisunit nunanut allanut tunngasunut politikki isumagisaraat, Ataatsimiititaliamili nunanut allanut tunngassutillit aamma sillimaniarnikkut naalakkersuinikkut sammisat Kalaallit Nunaannut soqutiginaatillit pillugit nassuiaatit paasissutissallu ingerlaavartumik nassiunneqartarput oqallisigineqartarlutillu.