Inuit Nunallu Inoqqaavisa pisinnaatitaaffii

Inuit pisinnaatitaaffii pillugit isumaqatigiissutit

Naalagaaffiit Peqatigiit inuit pisinnatitaafii pillugit isumaqatigiissutai uku tulleriit Kalaallit Nunaannut atuutsinneqarput:

  • Innuttaasutut Politikkikkullu Pisinnaatitaaffiit pillugit Naalagaaffiit Peqatigiit Isumaqatigiissutaat (CCPR)
  • Aningaasaqarnikkut, Inuttut atukkatigut Kulturikkullu Pisinnaatitaaffiit pillugit Naalagaaffiit Peqatigiit isumaqatigiissutaat (CESCR)
  • Ammip qalipaataanik immikkoortitsisarnerit qanorluunniit ittut atorunnaarsinneqarnissaat pillugu nunat tamat isumaqatigiissutaat   (CERD)
  • Naalliutsitaaneq naakkitsaatsumik inuppalunngitsumillu pinnittarneq, nikanarsaataasumik pinnittarneq pillaasarnerlu pillugit Naalagaaffiit Peqatigiit isumaqatigiissutaat (CAT)
  • Naalagaaffiit Peqatigiit Meeqqat pillugit isumaqatigiissutaat (CRC)
  • Naalagaaffiit Peqatigiit Meeqqat pillugit isumaqatigiissutaa (CRPD)
  • Naalagaaffiit peqatigiit arnat sutigut tamatigut assigiinngisitaasarnerata atorunnaarsinneqarnissaa pillugu isumaqatigiissutitaa (CEDAW)

Ukiut sisamat-tallimakkarlugit isumaqatigiissut pillugu misilitsittoqartarpoq. Kalaallit Nunaallu danskit aallartitaanni peqataasarput, immikkullu oqalugiaateqartarlutik. Isumaqatigiissutini misilitsinnerit ataatsikkut pineq ajorput.

Misilitsinnginnermi isumaqatigiissut pillugu nalunaarusiamik Nalagaaffiit Peqatigiifimmi ataatsimiitsitalianut suliaqartoqartarpoq. Kalaallit Nunaat danskit nalunaarusiaanut immikkut ilanngussisarpoq taavalu sammisat Kalaallit Nunaannut tunngasut pillugit allaaserisaqartarluni. Nalunaarusiat uani nanineqarsinnaapput: Inuit pisinnatitaaffii pillugit isumaqatigiissutit pillugit nalunaarusiat (Nittartagaq tuluttuinnaq allaqqavoq).

 

Taamatuttaaq Naalagaaffiit Peqatigiinni Inuit pisinnaatitaaffii pillugit Isumalioqatigiissitap inuit pisinnaatitaaffii pillugit nunat ilaasortanik misissuineq pilersissimavaa – Tamarmut Tunngasoq Nalilersuineq Nalliuteqqittartoq. Kalaallit Nunaat Tamarmut Tunngasoq Nalilersuineq Nalliuteqqittartumut atatillugu nalunaarusiornermi misilitsinnermilu aamma peqataasarpoq. Nalunaarusiat uani nanineqarsinnaapput: Tamarmut Tunngasoq Nalilersuineq Nalliuteqqittartumut atatillugu nalunaarusiat  (Nittartagaq tuluttuinnaq allaqqavoq).

 

Europami Isumalioqatigiissitaq nunat ilaasortani inuit pisinnatitaaffii pillugit pissutsit aammattaaq malinnaavigivai. Naliginnaasumik Ataatsimiitsitaliap nunat ilaasortat misissuivigisarpai taassumalu kingorna nalunaarusiortarlutik. Kalaallit Nunaat aamma tassunga ilaavoq. Nalunaarusiat uani nanineqarsinnaapput: Europami Isumalioqatigiissitamut nalunaarusiat (Nittartagaq tuluttuinnaq allaqqavoq).

 

Inunap inoqqaavi pisinnaatitaaffii pillugu

Nunat Inoqqaavisa Oqaasissaqarfiinut Naalagaaffiit Peqatigiit Permanent Forum-iani (UNPFII) sulineq Naalakkersuisunit tapersersorneqarpoq. Kalaallit Nunaat ukiumoortumik ataatsimiinnermi peqataasarpoq. UNPFII pillugu paasisaqarnerorusukkuit uunga alakkaagit: Nunat Inoqqaavisa Oqaasissaqarfiinut Naalagaaffiit Peqatigiit Permanent Forumiat (Nittartagaq tuluttuinnaq allaqqavoq).

 

Nunat Inoqqaavisa Pisinnaatitaaffii pillugit Immikkut ilisimasalittut suleqatigiissitaanni (EMRIP) sulineq Naalakkersuisunit tapersersorneqarpoq. EMRIP pillugu paasisaqarnerorusukkuit uunga alakkaagit: Nunat Inoqqaavisa Pisinnaatitaaffii pillugit Immikkut ilisimasalittut suleqatigiissitaq (Nittartagaq tuluttuinnaq allaqqavoq).