Nunavumik suleqateqarnermut Kultureqarnermut aningaasaliissutit pillugit ussassaarut

Naalakkersuisut Nunatta Nunavullu akornanni suleqatigiinnerup annertusarnissaa kissaatigivaat, taamaattumillu eqqumiitsuliortut kulturilerisullu kaammattorusuppaat kultureqarnermut aningaasaliissutinut suleqatigiinnissamut aammalu paarlaasseqatigiinnissamut suliniutinut 2015-mi ingerlanneqartussanut qinnuteqaqqullugit.

Matumuuna Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfiup maluginiaqquaa periarfissaqaravit Namminersorlutik Oqartussat kultureqarnermut aningaasaliissutaanut qinnuteqarsinnaagavit Nunavumit eqqumiitsuliortut kulturilerisullu suleqatigalugit.  

Suliniutinut pilersaarutinullu 2015-mi ingerlanneqartussanut qinnuteqarnissamut ulloq killigitinneqarpoq 15. September 2014 aammalu 15. februar 2015.

Pingaaruteqarpoq qinnuteqartut Nunavumit suleqateqarnissaat aammalu qinnuteqarnissamut piumasaqaatit allat naammassissagaat. Innuttaasunut  kiffartuussivimmi www.sullissivik.gl-imi paasissutissanik atuarsinnaavutit. Qinnuteqarnissamut immersugassaq sullissivimmi aamma nassaarisinnaavat.

Qinnuteqaativit inaarlugu suliarineqarnissaa sivikinnerpaamik sapaatip akunnerini 6-inik sivisussuseqarnissaa naatsorsuutigissavat. Taamaattumik apeqqutigisinnaasavit qulaajaaffigisimanissaat isumagisariaqarpat piffissaalluarallartillugulu tapiiffigineqarnissamik qinnuteqarlutit suliniutip aallartinnissaa sioqqullugu.

Maluginiaqquneqarpoq qinnuteqaatit takussutissat ilanngullugit allaffissornikkut suliarineqartarneranut periutsinik allannguisoqarnissaa pissammat ulloq 15. september 2014 aallarnerfigalugu.