Namminersorlutik Oqartussat timersortarfiit iluarsaannissaannut tapiissutaat

Namminersorlutik Oqartussat timersortarfiit iluarsaannissaannut tapiissutaasa najoqqutassai

 

Atuuffia nassuiaatillu

 

  § 1.  Najoqqutassat kommuneqarfiit timersortarfiinut, timersortarfiillu suliffeqarfinnit imminut pigisunit ingerlanneqartunut, iluarsaassinissamut Namminersorlutik Oqartussat tapiissutaannut atuupput.

 

  § 2.  Timersortarfik imatut paasineqassaaq illu portusuumik qilaalik, timersornernut naleqqussagaq.

 

  § 3. Timersortarfimmi iluarsartuussineq imatut paasineqassaaq timersortarfimmik tamakkiisumik imaluunniit timersortarfiup ilaanik iluarsartuussineq, aaqqinneqarsimasoq iluarsillugu, nalinginnaasumik taarsiinermi imaluunniit atortunik aserorsimasunik iluarsaassinermi.

  Imm. 2.  Timersortarfiup atortui tamarmik iluarsartuussinermi ilanngunneqarsinnaapput.

Tapiiffigineqarnissamut piumasaqaatit tapiissutillu atorneqarnerat

  § 4.  Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup kommune piumaffigisinnaavaa Najukkanut Sanaartornermullu Aningaasaateqarfimmiit aningaasanik tapiiffigineqarnissamut periarfissat paasiniaqqullugit.

 

  § 5.  Iluarsaassinermi aningaasartuutit 50 %-iinik Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik tapiisinnaavoq .

  Imm. 2.  Iluarsaassinermi imm. 1 malillugu matussuserneqanngitsut aningaasalersorneqarnissai tapiiffigineqartup qulakkiissavaa.

  Imm. 3.  Iluarsaassinermut suliniutip aallartereernerani aningaasartuutit takkuttut, suliniutillu missingersuutaani A-mi aningaasaqarnikkut killiliussat avataaniittut, timersortarfiup piginnittuaniit akilerneqassapput.

 

  § 6.  Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik tapiissutisinissamut piumasaqaatinik ilanngussaqarsinnaavoq.

 

Tapiissutisinissamut suleriaaseq

 

  § 7.  Timersortarfiit qanoq innerinut nalunaarusiat aammattaaq Namminersornerullutik Oqartussat ukiunut tallimanut pilersaarusiaasa ilaat ukiut tamaasa nutarterneqartartoq tunngavigalugit tapeqartitsisoqartarpoq.

 

  § 8.  Tapiissutinik aningaasaliissutinik pingaarnersiuilluni tulleriiaarineq una pilersaarut naapertorlugu pissaaq:

1) Ukiup aningaasanut inatsiseqarfiusup aallartinnerani Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup kommunimi suleqatigissallugit piukkunnartut suleqatigalugit iluarsaassinernut suliniutinut tapiissutit toqqassavai.

2) Suleqatiginissamut piukkussat missingersuutaat C missingersuut B-iinngorlugu suliarineqassaaq. Suliarinninnermi aningaasartuutit timersortarfiup piginnittuata aamma Namminersorlutik Oqartussat akornanni assigiimmik agguarneqassapput.

3) Suleqatiginissamut piukkussat missingersuutaat B-iit suliarineqareerpata suleqatiginissamut piukkussat iluarsaassinermut suliniutaat sorliit naatsorsuutigisatut tapiissuserlugit suliarineqassanersut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup nalunaarutigissavaa.

4) Suleqatiginissamut piukkussat missingersuutaat A-t suliarineqareerpata Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik ima iliussaaq:

a) iluarsaassinermut suliniutinut tapiissutit aningaasaliissutit inaarutaasut nalunaarutigissavaat, tassani missingersuutip A-p aningaasaqarnikkut killiliussami missingersuut B-ip missingersuutaanniipput.

b) iluarsaassinermut suliniutinut immikkut nalilersuinermik aallartitsissapput, tassani missingersuutaasa A-p aningaasaqarnikkut killiliussaata missingersuut B qaangeqqavaa. Immikkut nalilersuinermi tapiinissaq itigartitsinerlu pillugit timersortarfiup pineqartup piginnittua toqqaannartumik nalunaarfigineqassaaq.

 

  § 9.  Iluarsaassinermut suliniutip aallartinnissaanut tapiissutit siumoortumik tunniunneqassapput toqqaannartumillu tapiiffigineqartumut tunniunneqassallutik.

 

Aningaasalersuineq naatsorsuutillu

 

  § 10.  Namminersorlutik Oqartussat timersortarfinnut tapiissuteqarnerat Nunap Karsianiit aningaasalersorneqarpoq, Aningaasanut Inatsimmi konto 84.40.14 Kulturimut timersornermullu atugassanik sanaartorneq (Sanaartornermut aningaasaliissutit).

 

  § 11.  Tapiiffigineqartoq iluarsaassinermut suliniummut naatsorsuusiussaaq taamaalillunilu tapiissutit siunertamut aningaasaliiffigineqartumut atorneqarsimaneri pillugit uppernarsaassalluni. Suliniutip naanerata kingorna qaammatit marluk qaangiutsinnagit naatsorsuutit Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut apuunneqareersimassapput.

  Imm. 2  Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup tapiiffigineqartoq qaqugukkulluunniit qinnuigisinnaavaa iluarsaassinermut suliniummut tapiiffigineqartumut paasissutissartaanik nassiusseqqullugu, tassunga ilanngullugu iluarsaassinerup killiffigisaa.

 

  § 12.  Tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisoq:

1) eqqunngitsunik paasissutissiisimappat,

2) tapiiffigineqarnissamut piumasaqaataasut naammassinngippagit, tassunga ilanngullugit tapiiffigineqarnissamut piumasaqaataasinnaasut naammassinngippagit,

3) piffissaq eqqornagu naammaginartunik naatsorsuutinik nassiussippat,

4) iluarsaassinermut suliniummut isumaqatigiissutigineqartumut tapiissutit atunngippagit, imaluunniit

5) paasissutissat naapertuuttut, naatsorsuutit ilanngullugit nassiukkumanngippagit.

 

  § 13.  Najoqqutassiat 1. marts 2017-imi atuutilerput, 2016-imilu kingusinnerusukkulluunniit iluarsaassinermi suliniutit aallartissimasunut atuullutik.