Ilageeqarneq

Folkekirkens logo

Kalaallit Nunaanni Ilagiit Qallunaat Nunaanni ilagiinnut ilaasut, namminerisaminnik biskoppeqarfinngorlutik 1. november 1993-imi inissisimalerput. Ilageeqarneq pillugu inatsisartut peqqussutaat nr. 15, 28. oktober 1993-imeersoq malillugu ilageeqarnerup aaqqissuussaanera annertuumik allanngortiterneqarpoq. Upperisarsiornikkut siulersuineq biskoppimi inissisimanaannarpoq, oqaluffeqarnermilu allaffissornerup ingerlanneqarnera Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmi ataatsimoortinneqarluni.

Kalaallit Nunaanni Ilagiit 1. november 1993-imi nammineerluni stiftinngorpoq nammineq biskopeqalerluni. Kalaallit Nunaanni Namminersorlutik Oqartussaqalerneratigut ilagiinnut tunngasunut inatsisiliortutut pissaaneq ingerlatsinermullu oqartussaaneq Inatsisartunut nuunneqarput. Kalaallit Nunaanni ilagiit danskit naalagaaffianni ilagiinnut suli ilaapput.

Ilageeqarneq pillugu Inatsisartut inatsisaat nr. 9, 19. maj 2010-meersukkut ilagiinnut tunngassuteqartuni aaqqissuussaanikkut ilusiligaaneq allanngortinneqarpoq. Ilagiinnik qitiusumik allaffissornikkut aqutsineq maannamut Ilageeqarnermut Naalakkersuisoqarfimmut ilaasimagaluartoq annertunerusutigut biskopimut suliassanngortinneqarpoq.
Biskopip Biskopip allaffiatigut Ilagiit qitiusumik aqunneqarnerat allaffissornikkullu aqunneqarnerat stiftillu provstiinik, palasiinik ajoqiinillu ilagiinnik kristumiunik palasiinillu nakkutilliineq suliarisarai.

Kalaallit Nunaat provsteqarfinnut pingasunut katillugit 17-inik palaseqarfilinnut avinneqarpoq.

  • Provsteqarfik Kujataa sisamanik palaseqarfilik
  • Provsteqarfik Qeqqa Tunulu tallimanik palaseqarfilik
  • Provsteqarfik Avannaa arfineq pingasunik palaseqarfilik

Provsteqarfinni pingasuni tamani provsti allaffeqarpoq ilagiinnik nunap immikkoortuani allaffissornikkut aqutsiviusumik.

Taakku saniatigut palasimik atorfeqartoqarpoq kalaallinik Danmarkimiittunik sullissisuusumik
Naalagiarfiusartuni ikinnerpaamik 30-nik innuttaqartuni tamani oqaluffeqartuni imaluunniit atuarfiullutillu oqaluffeqartuni ilagiinnut sinniisut qinerneqartassapput. Ilagiit sinniisaasa qitiusumik suliassaraat ilagiit ilageeqanermi suliani eqeersimaartumik peqataanerannik siuarsaanissaq.

Palasit ulluinnarni sulinerminni ajoqinik ilinniarsimasunik ilinniarsimanngitsunillu ikiorteqarput.

Kalaallit Nunaanni Ilageeqarneq pillugu annertunerusunik paasissutissarserusuttunut Ilagiit qarasaasiami nittartagaat innersuunneqarpoq.

Ilageeqarnikkut Ilinniartitaanerit

Ajoqit ilinniartitaanerat Biskopip allaffianit isumagineqartarpoq. Anguniagaafoq naalagiarnerit tamarmik ajoqitut ilinniarsimasumit suliarineqartarnissaat. Ilinniartitaaneq biskopip allaffianit isumagineqartarpoq.

Pattattut ilinniartitaanerat pilersinneqarpoq ilageeqarnermi nipilersornikkut suliarineqartartut nukittorsarniarlugit taamatuttaarlu biskopip allaffianit isumagineqartarluni.

Upperisarsiornermik ilinniartitaaneq ukiuni pingasuni Upperisarsiornermut Institutimi bachelorinngorniarluni ilinniartitaanerivoq. Ilinniartitaaneq Kalaallit Nunaanni Ilagiinnit akuerisaavoq palasitut atorfininnissamut Danmarkimi ukiup affaata missaani pastoralseminariami ilinniartitaanermik ilallugu isissutaasinnaasutut Københavns Universitetimilu upperisarsiornermik ingerlaqqilluni ilinniarnissamut (cand.theol.) periarfissiilluni. Erseqqinnerusumik paasissutissarserusukkaanni Ilisimatusarfiup nittartagaa takuneqarsinnaavoq.