Nerisaqarnermut Timigissarnermullu Siunnersuisoqatigiit

Tunuliaqut siunertarlu
Siunnersuisoqatigiit 2004-mi augustimi pilersinneqarput. Tamanna sioqqullugu ilisimatusartut avataaneersut arlallit innuttaasut kalaaliminertortarnerannik isornartorsiuillutik oqaaseqartarsimapput, kalaalimerngit akuutissanik mingutsitsissutaasunik akoqarnerat innersuussutigalugu. Innuttaasunut kaammattuisuusariaqartut tassaapput Namminersorlutik Oqartussat, taamaattumik akuutissat mingutsitsissutaasut pillugit pisut malittarineqarnissaat, kiisalu nerisaqarnerup, timigissarnerup, peqqissutsillu akornanni ataqatigiittoqarnera pillugu Naalakkersuisunut ilaasortamut ingerlaavartumik siunnersuisarnissaq pillugu Siunnersuisoqatigiit pilersinneqarput.

Nerisaqarnermut Timigissarnermullu Siunnersuisoqatigiit sulinerat Naalakkersuisut Inuuneritta II-mi naalakkersuinikkut anguniagaat eqqarsaatigalugit isumagineqartarpoq: "Ileqqorissaarluni timimik atuisarnerit peqqinnartunillu nereriaatsit meeraanermi tunngavilerneqartartussaagaluarput, ileqqummi peqqinnanngitsut inuunerup ingerlanerani nappaatinik, toqujaarnermik inuulluarfinnillu annaasaqarnermik kinguneqartitsisarput." (Inuuneritta II 2013-2019. q. 6).

Siunnersuisoqatigiit suliassaat:
• Nerisaqarnerup timillu aalatittarnerata, peqqissuunerup/nappaateqarnerup imminnut ataqatigiinneri pillugit uppernarsaatinik saqqummiussisarneq kiisalu tamatumunnga attuumassuteqartunik kaammattuutinik ingerlatitseqqittarneq.
• Nerisaqarnerup timillu aalatittarnerata tamakkiisumik suliniummi anguniagassanut periusissanullu siunnersuusiortarneq, anguniakkallu piviusunngortinneqarnissaannut peqataasarneq.
• Nerisaqarnerup timillu aalatittarnerata pingaaruteqassusii pillugit innuttaasunut paasissutissiinermut siunnersuisarnermullu peqataasarneq.
• Nunani allani suliffeqarfinnit suleqatigisallu suliaannik sulinerminnut attuumassuteqartunik paasisassarsiortarneq.
• Kalaallit Nunaanni kalaaliminernik nerisaqartarnermut aamma timimik aalatitsisarnermut tunngasuni peqqissutsimut, kulturimut aamma aningaasaqarniarnermut attuumassuteqartunik ilisimatusarnissanik pisariaqartinneqartunik tikkuussisarneq.
• Attuumassuteqartunik pisortatigoortunik tusarniaanernut atatillugu tusarniaanermi akissuteqaateqartarneq.

Siunnersuisoqatigiit katitigaanerat
Siunnersuisoqatigiit Peqqissutsimut Attaveqarnermullu Naalakkersuisoqarfimmut atapput, ukiunullu sisamanut ilaasortassanik toqqaasoqartarpoq makkunanngaanneersunik:

• Nerisaqarneq pillugu paasisimasalik ataaseq DIN-imit toqqagaq
• Paasisimasalik ataaseq Atuisartunut Siunnersuisoqatigiivinit toqqagaq
• Paasisimasalik ataaseq INUILI-mit kalaallilluunniit sullissiveqarfiutaannit assingusumit allamit toqqagaq
• Paasisimasalik ataaseq Kalaallit Nunaanni Timersoqatigiiffiit Kattuffiannit toqqagaq
• Paasisimasalik ataaseq Peqqissutsimut Attaveqarnermullu Naalakkersuisoqarfimmit toqqagaq
• Paasisimasalik ataaseq Aalisarnermut, Piniarnermut Nunalerinermullu Naalakkersuisoqarfimmit toqqagaq
• Paasisimasalik ataaseq Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfimmit toqqagaq
• Ilaasortaq ataaseq Peqqissutsimut Attaveqarnermullu Naalakkersuisumit toqqagaq.

Siunnersuisoqatigiinnut ilaasortat nerisaqarnerup, timimik aalatitsinerup peqqissutsillu akornanni ataqatigiissoqarneranik ilisimasallit amerlasuujutinnissaat qularnaarlugu toqqarneqartassapput. Ilaasortaq piffissaanngitsukkut ilaasortaajunnaartillugu siunnersuisoqatigiit isumaqatigiilluinnarnermikkut ilaasortassamik nutaamik ikkussisoqarnissaa siunnersuutigisinnaavaat. Sinniisussanik toqqaasoqarneq ajorpoq.

Peqqissutsimut Attaveqarnermullu Naalakkersuisumit toqqagaq ukiuni sisamani ilaasortaasarpoq. Naalakkersuisut allanngornerini Naalakkersuisut nutaat inissitsiterneriniit sap.ak. arfinillit iluanni ilaasortassanik nutaanik toqqaasoqartarpoq. Siunnersuisoqatigiinnit tunuartoqartillugu piffissami sinneruttumi ilaasortassamik nutaamik toqqaasoqartarpoq.

Nerisaqarnermut Timigissarnermullu Siunnersuisoqatigiit siulittaasuat
Gert Mulvad
Nakorsaq, Dronning Ingridip Peqqissaavia Nuummi
E-mail: gm@peqqik.gl