Atuarfimmi kaammattuisoqarneq

Pilersaarut politikkikkut pingaartitanut ilaavoq, tassani suliniummi Meeraaneq toqqissisimanartoq-mi una pilersaarut, kiisalu Meeqqanut Inuusuttunullu periusissiami ilaatinneqarluni.
Atuarfimmi kaammattuisoqartarnerup meeqqat tapersersorneqarnissaminnut isumassorneqarnissaminnullu immikkut pisariaqartsitsisut isumagissavai. Kiisalu siuarsassavaa atuarfimmi sulisut tamarmik meeraq ernumanartumiippat iliuuseqarfigissallugu.

Kaammattuisoq sunaava?
Atuarfimmi kaammattuisoq atuarfimmi suliassarsiortuussaaq, atuarfimmilu atuartut akornanni ersarissuussalluni. Kaammattuisoq tatigisaalluni inissimasuussaaq meeqqanut inuusuttuaqqanullu ”anitsiarfeqartissallugit” oqaloqatiginninnertigut assersuutigalugulu sammisassaqartitsinissakkut. Kaammattuisartup siullertut meeqqat inuusuttullu immikkut pisariaqartitsisut qulakkeerlugillu tapersersussavai, atuarfiullu atuartunut taakkununnga iliuuseriniagai aquttuuffigissallugit.

Pilersaarutip aningaasalersorneqarnera
Atuarfinni kaammattuisoqartitsinissaq pillugu suniut ukiunik pingasunik sivisussuligaavoq, ukiuni atuarfiusuni 2012/2013 aammalu 2013/2014 100%-mik Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfimmit akilersorneqassalluni.
Ukiuni atuarfiusuni 2014/2015 Naalakkersuisoqarfiup 50%-mik aningaasalersussavaa.

Ukiumi atuarfiusumi 2015/2016 kissaataavoq pilersaarutip ingerlallualersimanissaa, aammalu kommuuninit ingerlaannartussatut pitsaaliuinermullu ilanngullugu aningaasalersorneqalersimanissaa.

Atuarfinni 18-ini kaammattuisut
Atuarfinnut 18-inut aningaasat 1 milliuunit ukiuni atuarfiusumi 2012/2013 agguaanneqarput, illoqarfinni 14-it aammalu nunaqarfinni sisamani.