Nuna tamakkerlugu qimarnuik katsorsaaviutigisoq

Illernit Qeqertarsuarni inissisimavoq nuna tamakkerlugu qimarnuiulluni katsorsaaviuvoq. Tassani arnat persuttagaasimasut meeraallu, ukioq ataaseq tikillugu sivisussusilimmik tapersersorlugillu ilin-niarsimasunik katsorsarnissaannut neqerooruteqarpoq.

Neqeroorut arnanut persuttagaasimasunut, ullumikkut neqeroorutit atuuttunut ilaasinnaanngitsunut, taakkununngalu iluaqutaasinnaanngitsunut sammivoq. Illernimi arnaq persuttaasartumiit avissaartinneqarluni tapersersorneqarnissaminut ilitsersorneqarnissaminut katsorsarneqarnissaminullu periarfissaqalissaaq.

Illernini aamma meeqqap atugarissaarnissaa ineriartornissaalu isiginiarneqarpoq. Tamannalu pissutigalugu sullissiviup anaanaasumut meeqqamullu katsorsartinnissaannut pilersaarusiorsimavoq. Pilersaarummi malitseqartitsinissaq aamma ilaavoq. Meeraq Illerniniitsillugu, Qeqertarsuarni atuarnissaq pillugu atuarfik suleqatigineqassaaq.
 
Illernit ilaqutariit sisamakkaarlugit tigusinnaavai. Najugaqarnermi ilaqutariittut pissutsit inissisimaffii piumasaqaataallu sinaakkusiornissami aallaaviussapput, katsorsaanissamilu pilersaarut peqqissaanermik aaqqissuulluakkamik (systemisk terapi) tunngaveqarpoq. Peqqissaalluni oqaloqatigiittarnerit inuit ataasiakkaarlugit eqimattakkuutaarlugillu ingerlanneqartarput, tassani atassuteqaatit pingaarnertut tunngaviullutik. Ilaqutariinni peqqissumik atassuteqaatit nukittorsarnissaat taamaammat Illernimi katsorsaalluni sulinermi qitiusumik tunngaviuvoq.
 
Katsorsaanermi saniatigut Illernit kommunit angerlarsimaffiusut, arnap persuttarneqarsimasup pitsaanerusumik inuuneqarnissaanut ilitsersorneqarnissaa pillugu suleqateqartarpoq. Angerlarnissaq sioqqullugu apeqqutit assersuutigalugu angajoqqaatut oqartussaaneq, inuttut aningaasaqarneq ineqarnerlu pillugit amerlasuutigut isumannaarneqarnissaat pingaaruteqartarpoq. Ilaqutariit angerlarnissaminnut piareersimasutut naliliiffigineqarnerini, arnamik sapaatit akunnikkaartumik oqaloqateqartarnissat, arnap inuunermik persuttaanertaqanngitsumik inuunissaminik aalajangiussimanissaani tapersersorneqarnissaa siunertaralugu pilersaarusiorneqartarpoq.
 
Illerninut innersuussineq kommuni aqqutigalugu pisarpoq. Arnamik persuttarneqarsimasumik innersuussinermini kommunip, arnaq sinnerlugu Illernit pisortaa attaveqarfigissavaa. Kommuni inissitanut iliuusissatut pilersaarusiussaaq, tassani najugaqarnermut siunertaq allaaserineqarsimassalluni. Sapaatit akunneri sisamat missaani najugaqareernerup kingorna, illernit katsorsaanissamut pilersaarusiussaaq, taannalu kommuni angerlarsimaffiusumut naleqqussarneqassaaq.
 
Illernini najugaqarneq akigititanik akiliisarneq atorlugu aningaasalersorneqartarpoq. Ilaqutariinnut ataatsinut ulloq unnuarlu 850 kr. akeqarpoq, tassunga ilaallutik ilaatigut, nerisaqarneq, najugaqarneq aamma peqqissartinnermik katsorsartinneq. Tassani najugaqarneq kommuni angerlarsimaffiup aningaasalersortarpaa, uuma ataani angalanermi aningaasartuutit.

Illernit attaveqarfigiuk:
Stina Mølgaard
Pisortaq
Oqa: +299 92 19 19
E-mail: illernit@nanoq.gl