2014 Ilaqutariinnik siunnersiueqatigiisitsineq

Ilaqutariinnik siunnersiueqatigiisitsineq pillugu ilisimaneqarnerulernissaq annertusarusullugu Ilaqutariinnermut Inatsisinillu Atuutsitsinermut Naalakkersuisoqarfik isumasioqatigiisitsisimavoq, ilaqutariinnik siunnersiueqatigiisitsineq isumaginninnermi ilaqutariinnik sullissinermi periutsitut saqqummiunneqarnissaa eqqartorneqarnissaalu siunertaralugu.

Ilaqutariinnermut Inatsisinillu Atuutsitsinermut Naalakkersuisoqarfik Nuummi ulluni 14. - 16. oktober 2014-imi ilaqutariinnik siunnersiueqatigiinneq pillugu isumasioqatigiisitsivoq isumaginninnermik suliassaqarfimmi aqutsisunut.

Ilaqutariinnik siunnersiueqatigiinneq sunaana?

Ilaqutariinnik siunnersiueqatigiinneq aalajangeeriaasiuvoq ilaqutariit tamarmik nukissaqarnerannik isummamik aallaaveqartoq. Familierådslagning-eqatigiinnermi meeraq, inuusuttoq, ilaqutariit ilisarisimasallu ilaatinneqartarput, ilaqutariit namminneq meeqqap inuusuttulluunniit ajornartorsiutaanut tunngatillugu akisussaasuutinniarlugit. Taamaattumik Ilaqutariinnik siunnersiueriaaseq ilaqutariit ilisarisimasallu meeqqamut inuusuttumulluunniit siunissami pitsaanerpaamik aaqqiissutaanissaanut attuumassutilinnik piviusorsiortunillu siunnersuuteqarnissamut ilaatinneqarlutillu kaammattorneqartarput.

 

Taanna qaqugukkut atorneqartarpa?

Ilaqutariinnik siunnersiueqatigiinneq ilaatigut inissiinissamik pinaveersaartitsinermut, inissiinermut, angerlartitsinermut il.il. atatillugu atorneqarsinnaavoq. Ilaqutariinnik siunnersiueriaaseq ilaqutariinni annerusumik allanngortoqartillugu, soorlu avittoqartillugu toqusoqartilluguluunniit atorneqarsinnaasorujussuuvoq. Siunnersoqatigiinnikkut meeqqap inuusuttulluunniit paaqqinniffimmi (netværk) pineqartumi sapinngisamik isumassorneqarluarnissaa qularnaarneqarsinnaavoq.

 

Isumasioqatigiinnermi aqutsisut Ilaqutariinnik siunnersiueriaatsimik pilersitsinissamut isumassarsiorlutillu paasisaqarsinnaapput. Suliassartaanut tunngatillugu inuit marluk periaatsimik atuinermut akuutinneqassapput; ataqatigiissaarisoq suliniuteqartuusorlu. Meeraq/inuusuttoq ilisarisimasamini tapersersortissaminik/oqaaseqartartussaminik toqqaassaaq. Tamatumani aamma imaqarniliortoq siunnersoqatigiinnermi isumaqatigiissutaasunik allattuisussaq toqqarneqassaaq.

 

Lis Helbo Horsensimit kommuniniillu allanit  pilersitsineq/atuilerneq, sulisussat, aningaasalersuineq, aqutsineq il.il. pillugit misilittakkanik eqqartuivoq. Kommunimi periaatsimik misilittagarineqartut periaatsillu Nunatsinni qanoq atorneqartariaqarnera pillugu Kommuneqarfik Sermersooq ingerlatitseqqiivoq.