2014 Isumasioqatigiinneq: Nunatsinni timimikkut innarluutilinnik sullissinermi unammilligassat, pisariaqartitat siunissamilu periarfissat

Meeqqat inuusuttullu ineriartornermikkut ajoqutillit unammilligassaat siunissamu-llu periarfissaat pillugit ataatsimeersuarneq iluatsilluartoq

Pingasunngornermi marsip 26-anni 2014, Ilaqutariinnermut Inatsisinillu Atuutsitsinermut Naalakkersuisoqarfik angajoqqaat peqatigiiffiat Inooqat suleqatigalugu peqataaffigineqarluartumik ataatsimeersuartitsivoq, meeqqat inuusuttullu ineriartornermikkut ajoquteqartut unammilligassaat, pisariaqartitaat periarfissaallu qitiutinneqarlutik.

Ilaqutariit ineriartornermikkut ajoqutilinnik meerartallit oqilisaaffigineqarnissamik pisariaqartitsinerat suliamillu suliarinninnerup pitsanngorsaavigisariaqarnera angajoqqaat peqatigiiffiata Inooqatip, Naalakkersuisup minnerunngitsumillu angajoqqaat arlaqartut ineriartornermikkut ajoqutilinnik meerallit saqqummiussereernerisigut ersarissivoq.

"Unammilligassat angajoqqaat pineqartut ulluinnarni misigisartagaat tusarlugit uannut assut pissarsinarpoq. Qulequtaq pingaaruteqarpoq, ataatsimoorlutalu oqaluuserisassanngortikkatsigu nuannaarutigaara, meeqqat inuusuttullu ineriartornermikkut ajoqutillit pitsaanerusumik atugaqalersinniarlugit Inooqatip siunissami suleqatigeqqinnissaa qilanaaraara,” Ilaqutariinnermut Inatsisinillu Atuutsitsinermut Naalakkersuisoq Martha Lund Olsen, aamma ataatsimeersuarnermik ammaasuusoq oqaluttuarpoq.

Ataatsimeersuarnerup naammassilernerani peqataasut pineqartumi unammilligassatut pingaarnerpaatut isigisatik saqqummiuppaat. Naalakkersuinermik suliaqartut, kommunit angajoqqaallu tungaannit ilaatigut oqilisaassineq, suliassaqarfimmi sulianik suliarinnittarnerup pitsanngorsaavigineqarnissaa, angajoqqaanut pikkorissaanerit kiisalu inuusuttunut iliuusissatut pilersaarutit pitsaanerusut annertuumik ujartorneqarput, taamaasilluni taakku meeqqat atuarfiat qimareerlugu inersimasutut inuuneqarnerup iserfiginissaata tungaanut sunngiffimmi neqeroorutit, atuarnissamik neqeroorutit taamaassappallu sulinissamut periarfissat pillugit pineqartunut pilersaaruteqartoqassammat. Aammattaaq innarluutilinnut tunngasut nipangiussaaginnartarnerisa annikillinissaata sulissutiginissaa annertuumik kissaatigineqarpoq.

Ataatsimeersuarneq Ilaqutariinnermut Inatsisinillu Atuutsitsinermut Naalakkersuisoqarfiup angajoqqaallu peqatigiiffiata Inooqatip suleqatigiilernerisa 2013-imi pilersinneqartup kinguneraa.

Qaaqqusissut - Takuuk.

Programi - Takuuk.

Baseline - Takuuk.

Peqataasut - Takuuk.

Naalakkersuisoq Martha Lund Olsen-ip oqalugiaataa - Takuuk.

Benny Kokholm, INOOQAT oqalugiaataa - Takuuk.

Immikkoortortaqarfimmi pisortaq Kirsten Olesen-ip oqalugiaataa - Takuuk.

Tusagassiorfinnut nalunaarut 24. marts 2014 - Takuuk.

Tusagassiorfinnut nalunaarut 28. marts 2014 - Takuuk.