2011: Ilaqutariinnik katsorsaasarneq pillugu ataatsimeersuarneq

Ilaqutariinnik katsorsaasarneq pillugu 20. – 21. oktober 2011-mi Nuummi Katuami ataatsimeersuarnermut Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik aaqqissuivoq. Ilaqutariinnik katsorsaariaatsit assigiinngitsut, kiisalu tamatumani Nunavumi, Canadami, Nunatsinni, Danmarkimi Norgemilu misilittakkat saqqummiunneqarput.

Suliamik isumaginnittuusut allallu Nunatsinni ilaqutariinnik katsorsaanermi siunissami sulinissaq pillugu eqqartuinissamut isumassarsisinneqarnissaat siunertaralugu Nunavumi, Norgemi, Danmarkimi Nunatsinnilu ilaqutariinnik katsorsaasarnermi periutsit misilittakkallu saqqummiunneqarnissaat pingaarnertut siunertaavoq.

Ataatsimeersuartinniakkat tassaapput suliamik isumaginnittuusut allallu ilaqutariinnik katsorsaanermut attuumassuteqartut.

Politikikkut tulleriiaarineq
Naalakkersuisut naalakkersuisooqatigiinnissamik isumaqatigiissummi ungasinnerusoq eqqarsaatigalugu suliniutinik, ilaqutariinnut ataasiakkaanullu pineqartunut atugarissaa-titsilerfiusussanik tulleriiaaripput.

Meeraanermi toqqissisimaneq pillugu periusissami ilaqutariinnut immikkut pisariaqartitsisunut ilaqutariinnik katsorsaanermik pilersitsinissaq immikkut suliniuteqarfiuvoq.

”Ilaqutariinnik sullissiviit kommunini ilaqutariinnut isumaginninnikkut pinaveersaartitsinermik tapersersuinermillu suliaqarnermut pingaarutilimmik ilaapput. Neqeroorutip taassuma sunniutai neqeroorutit siunnerfilersorneqarnerisigut ineriartortinneqarnerisigullu annertusarneqassapput. Ilaqutariinnik immikkut pisariaqartitsisunik tapersersuinissamut periarfissat neqeroorutit meeqqamut atassuteqarnermik annertusaataasussat meeqqanillu tunngaviusumik isumassuineq pillugu ilisimasaqalersitsiviusussat immikkut aaqqissukkat aqqutigalugit nukittorsarneqassapput, tassami angajoqqaat taakku ilaasa meeqqamut isumassuinerup sunik nassataqarnera namminneq ilinniarsimanngisaannarmassuk. Sulineq kommunit qanimut suleqatigalugit pissaaq.”

Atugarissaarneq pillugu ataatsimiititaliap kaammattuutaani 2011-mi marsimeersuni allassimavoq sumiiffimmik ilaqutariit saaffigisinnaasaannik peqartariaqartoq, sumiiffimmi tassani pisumi aalajangersimasumi ilaqutariinnut ikiorsiisariaqarfiusumi tapersersuisariaqarfiusumilu piginnaasaqarfiullunilu suliniarfiusinnaasumik. Atugaris-saarneq pillugu ataatsimiititaliamit siunnersuutigineqarpoq ilaqutariinnik sullissiviit taamatut saaffiginnittarfiussasut siusinnerusukkullu suliniarnerusimasoq ilaqutariinnik sullissivimmiitinneqassasoq. Ilaqutariinnik sullissivinni suliamik isumaginnittuusut attuumassutillit, ass. ilaqutariinnut siunnersortit sulisinneqassapput, kiisalu ilaqutariinnik sullissivinni aalajangersimasumik oqaloqatiginnittarnerit, pikkorissartitsisarnerit, sullis-sissutit il.il. pillugit ernisussiortut, meeraaqqerisut, PPR, Piareersarfik suliffissarsiuus-sisarfiillu suleqatigiinnissamik isumaqatigiissuteqarfigineqarlutik.

Ilaatigut ilaqutariinnik sullissiviit siunissami nukittorsarneqarnissaat siunertaralugu Ilaqutariinnermut, Kultureqarnermut, Ilageeqarnermut Naligiissitaanermullu Naalakker-suisoqarfiup ilaqutariinnik sullissivinnik naliliinermi sulingaatsiarneq naammasseqqam-merpaa.

Aammattaaq Naalakkersuisoqarfik ilaqutariinnik sullissivinni sulisunik 2009 – 2011-mi immikkoortukkuutaakkamik ukiuni marlunni ilinniartitsisimavoq.


Uani qaaqqusissut takuuk (pdf-fil)

Uani programmi takuuk (pdf-fil)