Naalagaaffiit Peqatigiit Meeqqat pillugit isumaqatigiissutaa

Meeqqat Pisinnaatitaaffii pillugit Naalagaaffiit Peqatigiit Ataatsimiititaliaani ilaasortaapput immikkut ilisimasallit nunanit Naalagaaffiit Peqatigiinnut ilaasortaneersut. Ataatsimiititaliap suliassaa pingaarneq tassaavoq Meeqqat pillugit isumaqatigiissummi pisussaaffiit nunanit malinneqarnersut nakkutigissallugu

Meeqqap pisinnaatitaaffii pillugit Naalagaaffiit Peqatigiit Ataatsimiititaliaat (Meeqqat pillugit Ataatsimiititaliaq) Meeqqat pisinnaatitaaffii pillugit Naalagaaffiit Peqatigiit isumaqatigiissutaanni artikel 43 aqqutigalugu pilersinneqarpoq.

Ataatsimiititaliap suliassaasa pingaarnersaat tassaavoq Meeqqat pillugit Naalagaaffiit Peqatigiit isumaqatigiissutaanni peqataasut piffissani aalajangersimasuni ataatsimiititaliamut nalunaarusiaannik misissuisarnissaq. Piffissani aalajangersimasuni nalunaarusiani ilaatigut nassuiaatigineqartarpoq nunat isumaqatigiissummik qanoq naammassinnittarnersut, meeqqat atugarissaarnissaannut periarfissaannullu siuarsaataasumik suliniutaat, meeqqanut tunngatillugu ilisimasat annertuut kisitsisitigullu paasissutissat il.il.

Nalunaarusianut atatillugu ataatsimiititaliaq Genèvemi pisortatigoortumik nalilersuisarpoq. Tamatumani nunat periarfissinneqartarput aallarniutaasumik naatsumik oqalugiarnissamut, tamatumalu kingorna nalunaarusiaq pillugu ataatsimiititaliaq apeqquteqarsinnaasarluni, apeqqutillu nunat naalakkersuisuinit aallartitanit akissuteqarfigineqartarlutik.

Nalilersuinerup kingorna ataatsimiititaliap inerniliissutini kaammattuutinilu tamanut saqqummiuttarpai, taakkulu nalinginnaasumik imarisarpaat nunat suliniutaannut isummersuutit pitsaasut pitsaannginnerillu.

Naalagaaffiit Peqatigiit Meeqqat pillugit Ataatsimiititaliaata nunanit ilaasortaasunit naalakkersuinikkut attuumassuteqanngitsumik suliniaqatigiit (NGO-t) suleqatigai. NGO-t isornartorsiuisunik nalunaarusiortarput, nunat pisortatigoortumik nalunaarusiaannut tapertaasunik. Tamatuma saniatigut ataatsimiititaliap nalilersuinerit sioqqullugit NGO-t ataatsimeeqatigisarpai.