Nakkutilliinermik Ingerlatsivik

Nakkutilliinermik Ingerlatsivik Isumaginninnermut Inatsisinillu atuutsitsinermut Naalakkersuisoqarfimmi immikoortortaqarfiuvoq, makkua nakkutilliivigisassaralugit
 

          Pisortat inunnik isumaginninnermi inatsisit malillugit ingerlatsinerat
          Isumaginninnerup iluani ulloq unnuarlu paaqqinniffiit

Nakkutsilliinermi Ingerlatsiviup nakkutilliilluni sulinera inatsisit uku aallaavigalugit ingerlavoq:

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-meersoq, § 1
Isumaginninnermut tunngasunik nakkutilliineq pillugu Namminersornerullutik Oqartussat nalunaarutaat nr. 6, 16. februar 2006-meersoq
Meeqqat tapersorneqarnissaannut Inatsisartut inatsisaat nr. 20, 26. Juni 2017-meersoq,
§§ 9-11
Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat nr. 19, 24. novembari 2017, § 28
 
Pisortat suliaqarfiinik nakkutilliineq
Nakkutilliinermik Ingerlatsivik oqaloqatigiinneq atorlugu kommuunit isumaginninnermi inatsisit malillugit sullissinerinik nakkutilliisarpoq. Nakkutilliineq kommunit qitiusumik ingerlatsiveqarfiini, aammalu illoqarfiini nunaqarfiinilu pisarpoq. Inunnik isumaginninnermi inatsisit maleruarlugit kommunit sullissinersut nakkutilliiffiginerini makku qitiutillugit qiviarneqartarput: 1. malittarisassat suleriaaserlu aallavigalugu malittarisassat, 2. nassuiaaneq nalilersuisarnerlu, 3. pisussaaffiit peqataasinnaassuserlu, 4. suliassamut paasissutissat suliassanillu sullissineq, 5. nakkutiginninneq naammagittaalliutillu. Nakkutilliineq pigajuttarpoq malittarisassaqarfiup aalajangersimasup ataatsip arlariilluunniit ukkannerisigut. Nakkutilliinermik Ingerlatsivik kommunimi ingerlatsivimmi paasissutissanik nakkutilliiffigisamut attuumassuteqartunik paasissutissanik takunnissinnaatitaavoq. Matumani soorlu pineqarpoq nakkutilliiffigisaq paasissutissanik inunnut ataasiakkaanut tunngasunik imalinnik ilaqarsimappata, paasissutissanik tamakkunannga takunnissinnaatitaavoq, kiisalu allagaatinik kommunip suliaanut attuumassuteqartunik takunnissinnaatitaalluni.

Kommunit tamarmik minnerpaamik qinigaaffiup ataatsip iluani ataasiarlutik nakkutilliiffigineqartartussaapput.

Ulloq unnuarlu paaqqinniffinnik nakkutilliineq

Nakkutilliinermi Ingerlatsiviup ulloq unnuarlu paaqqinniffiit Namminersorlutik Oqartussat pigisaat, kommunit pigisaat, kiisalu ulloq unnuarlu paaqqinniffiit imminnut pigisut ingerlatsinerat, aningaasartuuteqartarnerat, perorsaanermullu tunngasunik suliarisartagaat nakkutilliiffigisartagassarai. Nakkutilliinermik Ingerlatsiviup ulloq unnuarlu paaqqinniffinni pitsaassuseq nakkutilliiffigisartagassaraa, sammisat makkuussallutik: 1. ilinniagaq suliarlu, 2. namminiissuseq aamma attuumassuteqarfiit, 3. sullinniakkat, periutsit angusallu, 4. aaqqiissuussaaneq aqunneqarnerlu, 5. piginnaasat, 6. aningaasaqarneq, 7. initigut periarfissat. Nakkutilliinermik Ingerlatsiviup nakkutilliinermini paasissutissanik pisariaqartitaminik ulloq unnuarlu paaqqinniffimmit tunineqaqqulluni piumasaqarsinnaatitaavoq, paasissutissat nakkutilliinerup naammassinneqarsinnaaneranut pingaaruteqarpata.

Nakkutilliinermik Ingerlatsivik sapinngisamik ukiut pingasut ingerlanerini marloriarluni nakkutilliiartortartussaavoq, nakkutilliinerlu nalunaaqqaarluni nalunaaqqaarnaniluunniit ingerlanneqartarluni.



Nakkutilliinermik Ingerlatsivik oqarasuaat +299 34 50 00 atorlugu sianerfigineqarsinnaavoq ulluni ataasinngornermiit tallimanngorneq ilanngullugu nal. 09.00-ip aammalu 16.00-ip akornanni. Taassuma saniatigut qarasaasiakkut allaffigineqarsinnaavoq ugguuna tilsynenhed@nanoq.gl
Qarasaasiakkut allalluni saaffiginninnerit (saaffiginneqqaarnerit) tamarmik tassunga nassiunneqartassapput, tassanngaanniit suliamik sullissisumut ingerlateqqinneqartarmata, tassanngaanniillu akissuteqarfigineqartussaallutik.