Inatsisitigut ataataqanngitsut

Ataataqarnissat pisinnaatitaaffigaat!

Kikkut tamarmik ataatartik kinaanersoq ilisimassallugu pisinnaatitaaffigaat. 2014-imili inatsit nutaaq 1. juni 2014-imi atuutilermat inatsisitigut ataataqanngitsut nutaanik pisinnaatitaaffeqalerput.

Inatsisip nutaap atuutilerneratigut inatsisitigut ataataqanngitsutut ukuninnga pisinnaatitaaffeqalerput:

  • Ataatat kinaanersoq aalajangerniarlugu ataatassarsiuinermik aallartitsisinnaavutit
  • Kina ataataginerit aalajangerneqareerpat, ataatannit ilaqutaanillu kingornussisinnaatitaalissaatit
  • Aamma ataatavit kinguliaqutaa tigusinnaalissavat

Ataatassarsiuinermik aallartitsiniaruit najukkani eqqartuussivimmut allagaqassaatit. Ataatassarsiuinermik aallartitsiniaruit kina ataataginerlugu ilisimasariaqanngilat. Eqqartuussiviup suliap misissuiffiginissaa isumagissavaa.

Inatsisitigut ataataqanngitsumut anaanaaguit, aamma panivit ernerpilluunniit kina ataatagineraa aalajangerniarlugu ataatassarsiuinermik aallartitsisinnaavutit. Panivit ernerpilluunniit najugaani eqqartuussivimmut allagaqarlutit ataatassarsiuinermik aallartitsissaatit.

Paasissutissat allattorsimaffianni uani qanoq iliorlutit ataatassarsiuinermik aallartitsisinnaanerlutit, kingornussisinnaatitaaneq pillugu aamma kinguliaqutaq pillugu annertunerusumik atuagaqarsinnaavutit.

Qanoq iliorlutit ataatassarsiuinermik aallartitsissanerlutit nalornigukku, najukkani eqqartuussivik imaluunniit Kalaallit Nunaanni Eqqartuussivik attaveqarfigisinnaavat. Kalaallit Nunaanni eqqartuussiviit najugaat il.il. Kalaallit Nunaanni Eqqartuussiviit nittartagaanni nassaarisinnaavatit.

Inatsisit attuumassutillit:

Inatsit tunngavigalugu, ilaatigut inatsisitigut ataataqanngitsut ullumikkut inuusut amerlassusaat paasiniarlugit suliniutinik arlalinnik aallartitsisoqarpoq, inatsisitigut ataataqanngitsut amerlassusaat pillugit allakkiaq takuuk

Inatsisitigut ataataqanngitsuunerup inummut sunniutai pillugit 2017-imi qulaajaneq tunngavigalugu nalunaarusiortoqarpoq. Apeqqutinik inuttut inatsisitigut ataataqanngitsuunermut tunngasunik suliarinninnissamut pisariaqartitsisunut nalunaarusiaq aallaavigalugu inunnut inatsisitigut ataataqanngitsunut suliniuteqartoqassaaq.

Inatsisitigut ataataqanngitsuunerup inummut sunniutai pillugit qulaajaaneq