Inatsisinik atuutsitsineq

Innuttaasut inatsisitigut illersugaanissaat nunani suniluunniit tamat oqartussaaqataanerannik ingerla-tsiffiusuni qitiuvoq.

Toqqissisimanissaq pineqarpoq, aqqusinikkut pisutsilluni inatsisit unioqqutinneqarsimatillugit politiit akuliunnissaat naatsorsuutigisinnaasariaqarpoq. Eqqartuussiviit kinaassusersiortuussanngillat inatsisillu akuerineqarsimasut naapertorlugit eqqartuussissallutik. Pinerlineqartut eqqarsaatigineqarnerat pingaartinneqassaaq. Peqatigisaanilli inuit pisinnaatitaaffii pillugit isumaqatigiissutit Kalaallit Nunaata atuuttussanngortissimasai, unnerluussinerit suliarineqarnerini eqqortinneqassapput.

Eqqartuussivinnit inuk pineqaatissinneqartussanngorlugu eqqartuunneqarpat, innuttaasut eqqartuussutip Pinerluttunik Isumaginnittunit naammassineqarnissaa naatsorsuutigisinnaasariaqarpaat. Inissiisarfimmiittut iperagaagunik inuunermut pinerluffiunngitsumut uternissaannut ikiussallugit Pinerluttunik Isumaginnittut aamma suliassaraat. Sulineq tamanna qulakkeerniarlugu Inatsisinik atuutsitsinermik suliassaqarfiup pingaartumik politiit, eqqartuussiviit aamma pinerluttunik isumaginnittut qanimut suleqatigai - illuatungiusulli allat inatsisinik atuutsitsinermut suliassaqarfimmut attuumassuteqartut suleqatigineqarput, matumani isumaginninnermik suliassaqarfik ilanngullugu. 

Kalaallit Nunaanni Eqqartuussiveqarneq pillugu Siunnersuisoqatigiit Inatsisinik atuutsitsinermut suliassaqarfiup ataaniippoq. Kalaallit Nunaanni eqqartuussiveqarneq pillugu ataatsimiititaliarsuup isumaliutissiissutaa tunngavigalugu siunnersuisoqatigiit pilersinneqarput, pinerluttulerineq eqqartuussiveqarnerlu pillugit Kalaallit Nunaanni Namminersorlutik Oqartussat qallunaallu oqartussaasa akornanni suleqatigiinnerup ataqatigiissaarneqarnissaanut peqataassalluni. Kalaallit Nunaanni Namminersorlutik Oqartussat saniatigut eqqartuussiviit, Pinerluttunik Isumaginnittut, politiit, kommunit, Justitsministeria, Domstolsstyrelsi aamma ilisimatusarfimmi ilisimatooq allallu siunnersuisoqatigiinni sinniisoqarput. 

Inatsisinik atuutsitsinermi suliassaqarfimmi suliassat suliassaqarfiillu pingaarnerit makkuupput:

• Pinerluttulerinermi inatsiseqarneq, matumani eqqartuussivinnik, politiinik, pinerluttunik isumaginnittut, Danmarkimilu Justitsministeriamik suleqateqarneq ilanngullugit.
• Kalaallit Nunaanni Eqqartuussiveqarneq pillugu Siunnersuisoqatigiit

Inatsisinik atuutsitsinermut suliassaqarfik tiguneqarnikuunngilaq. Tamanna ima isumaqarpoq, akisussaaffik aallaavittut qallunaat oqartussaasuiniittoq, matumani Justitsministeria ilanngullugu. Inatsisinik atuutsitsinermut suliassaqarfimmut Naalakkersuisut Inatsisartullu politikkikkut kissaataat piviusunngortinniarlugit Naalakkersuisoqarfiup qallunaat oqartussaasui suleqatigai.

Inatsisinik atuutsitsinermut suliassaqarfimmi inatsisiliorneq qarasaasiakkut qallunaatut sammisami oqaasertaq ’Grønland’ atorlugu www.lovtidende.dk. .-imi saqqummersinneqassaaq.

Inatsisinik atuutsitsinermut suliassaqarfimmi inatsisiliornerup kalaallisuunngortinnera qarasaasiakkut Kalaallit Nunaanni Naalagaaffiup Sinniisoqarfiata nittartagaani ujaasiffissami Inatsiseqartitsineq ataani pissarsiarineqarsinnaavoq.