Aatsitassanut Aqutsisoqarfik

Aatsitassanut Aqutsisoqarfik - aatsitassanut aqutsisoqarnermut iserfissaq

Kalaallit Nunaanni aatsitassanut oqartussaq tassaavoq Aatsitassanut Naalakkersuisoqarfiup ataani Aatsitassanut Aqutsisoqarfik kiisalu Aatsitassanut Suliassaqarfinnut Avatangiisinut Aqutsisoqarfik. Pinngortitamut Avatangiisinullu Naalakkersuisoqarfiup ataani Avatangiisinut Aqutsisoqarfik takusinnaavat uani.

Inatsimmi tunngavissaraarput Aatsitassat pillugit ingerlatallu tamatumunnga pingaarutillit pillugit inatsisartut inatsisaat nr. 7, 7. december 2009-imeersoq (aatsitassanut ikummatissanullu inatsit). Aatsitassanut ikummatissanullu inatsit kiisalu allannguutai tamaasa takuneqarsinnaapput uani.

Innuttaasutut annikitsumik aatsitassarsiornissamut akuersissummik qinnuteqarusukkuit, imaluunniit ingerlatseqatigiiffittut aatsitassanik misissueqqaarnissamut, misissuinissamut imaluunniit piiaanissamut akuersissummik qinnuteqarusukkuit, uagutsinnut qinnuteqassaatit. Tamatuma kingorna immikkoortortat allat, oqartussat suliarinninneranni ikiuuttussat, peqatigalugit suliaqarnissaq ataqatigiissaassavarput. Tunngaviusumi tassani sunniuteqarluartumik suliassanik suliarinninnissaq qulakkeerneqassaaq.

Akuersissummik qinnuteqarusukkuit, paasissutissat annertunerusut takusinnaavatit nittartakkatsinni uani.

Aatsitassanut Aqutsisoqarfimmi Akuersissuteqartarnermut immikkoortortaqarfiup qinnuteqaatit tiguppagu, suliassap suliarineqarnera aallartissaaq. Ingerlatassanni Aatsitassanut ikummatissanullu inatsimmi piumasaqaatit tamarmik naammassineqarsimanissaat qulakkeertussaavarput. Ingerlatassat inatsisit malillugit Naalakkersuisunit akuerineqartussaappata, Aatsitassanut Suliffeqarnermullu Naalakkersuisoqarfimmut inassuteqaat suliarissavarput. Tassani Naalakkersuisunut akuersissut pillugu aalajangiisussanut, isummernissamut tunngavissiaq inaarutaasoq suliarineqassaaq. Ingerlatassat inatsisit malillugit nammineerluta aalajangiiffigisussaagutsigu, Aatsitassanut Aqutsisoqarfimmi aalajangiineq pissaaq. Aalajangiinerit Aatsitassanut Aqutsisoqarfimmi aalajangiiffigineqartut Naalakkersuisunut naammagittaalliutigisinnaavatit.

Kikkuuvugut?




Akuersissuteqartarnermut immikkoortortaqarfik

Akuersissuteqartarnermut immikkoortortaqarfik aatsitassanik misissueqqaarnissamut, misissuinissamut piiaanissamullu akuersissummik qinnuteqaatinik ingerlaavartumik suliarinnittarpoq. Aamma ilisimatusarnikkut misissuinernik suliaqarnissamut akuersissutinik suliarinninneq isumagisaraarput.

Suliassanik suliarinninneq suleqatigisartakkatsinnut tusarniaaffigineqartussanullu tamaginnut ataqatigiissaartarparput. Tamatuma saniatigut aatsitassarsiornermut suliassaqarfimmi nunani tamalaani oqartussat suleqatigiinnerat isumagisaraarput.

Teknikimut Nakkutilliinermullu Immikkoortortaqarfik

Teknikimut Nakkutilliinermullu Immikkoortortaqarfiup oqartussat suliassai, ingerlatseqatigiiffinnut aatsitassaqarfinni piiaanissamut akuersissummik tunineqarsimasunut attuumassuteqartut, akisussaaffigai. Immikkoortortaqarfiup Kalaallit Nunaanni aatsitassanik piiaanerup isumannaallisaanermut peqqinnissamullu tunngatillugu isumannaatsumik ingerlanneqarnissaata qulakkeernissaa, pingaarnertut suliarisarpaa.

Tamatuma saniatigut misissuinermi ingerlatanut annertunerusunut atatillugu nakkutilliinermi suliassat, kiisalu ingerlatseqatigiiffinnut aatsitassaqarfinni piiaanissamut akuersissummik tunineqarsimasunut attuumassuteqartumik nakkutilliineq, immikkoortortaqarfiup isumagisarai.
  • Tunisassiornermut nakkutilliineq aamma tunisassiornernut akuersissuteqartarneq
  • Isumannaallisaanikkut qillerinerni nakkutilliineq
  • Aatsitassarsiorfinnut annertusaanissamut pilersaarutinut akuersissuteqarneq
  • Aatsitassarsiorfinni isumannaallisaanikkut peqqissutsikkullu nakkutilliineq
  • Upalungaarsimanermut pilersaarutinut nakkutilliineq
  • Qaartiterutissaasivinnut nakkutilliineq