Nationalparken i Nord og Oestgroenland

Kalaallit Nunaata avannaarsuata kangianiittoq Nuna Allanngutsaaliugaq nunarsuarmi nunat allanngutsaaliukkat annersaraat. Uumasorpassuarnut naasorpassuarnullu nuna allanngutsaaliugaq pingaaruteqarluinnarpoq, aammattaaq kulturikkut, ilisimatusarnikkut soqutigisaqarfiulluni takornariaqarnermullu aatsitassarsiornermullu tunngasunik suliaqarfiulluni. Siunissaq eqqarsaatigalugu soqutigisat assigiinngitsut suuneri paasiniarneqartariaqarput, Nunap allanngutsaaliukkap aqutsivigineqarnissaa eqqarsaatigalugu nunamilu isumalluutit assigiinngitsut eqqarsaatigalugit.

Nuna allanngutsaaliugaq naatsumik

Nuna allanngutsaaliugaq Kalaallit Nunaata avannaarsuata kangianiittoq 972.000 km2-isut annertutigaaq nunarsuarmilu annersaalluni. Nuna ima annertutigaaq Frankrig Spanialu katikkaanni annertoqatigingajallugit, Ittoqqortoormiit avannaaniit Knud Rasmussens Land-imit Mestersvig-ip tungaanut isorartussuseqarluni. Nuna Allanngutsaaliugaq najugarineqanngilaq inoqaranilu, misissuinermi stationit amerlanngitsut aammalu qimussimik alapernaarsuisoqatigiit Sirius nunami angalaartut eqqaassanngikkaanni. Ilisimatusartunilli takornarianillu ataatsimoorlutik angalasunit tikinneqartarpoq, taamatuttaaq umiarsuit takornariartaassuit kangerlunnut pulasarput.

Nuna tamakkerlugu inatsisiliorneq nunallu tamarmik akornanni isumaqatigiissutit

Nuna Allanngutsaaliugaq Kalaallit Nunaata avannaani kangianilu kommunit agguataarnerisa avataaniippoq. 

Kalaallit Nunaata avannaarsuani kangianilu Nuna Allanngutsaaliugassatut Immikkoortitaq pillugu Namminersornerullutik Oqartussat nalunaarutaat nr. 7, 17. Juni 1992-imeersumi nalunaarutillu allanngortinneqarnerat Namminersornerullutik Oqartussat nalunaarutaat nr. 16, 5. Oktober 1999-imeersumi aalajangersakkat atuarneqarsinnapput. Nuna Allanngutsaaliugaq uumassuseqarfittut toqqarneqarpoq UNESCOp Man and the Biosphere-programmip (MAB) ataani. MAB-imut piumasaqaatit UNESCOp nittartagaani atuarneqarsinnaapput.