Kangerlussuup eqqaata aqutsivigineqarnissaanut pilersaarusiaq

Ukiut tamaasa Kangerlussuup eqqaa tikinneqarluartarpoq. Ukiut 4.000-it matuma siornali tikinneqartarsimasoq ilisimaneqarpoq. Nunap alianaannersua pillugu tikinneqartarpoq, soqutigisalli assigiinngitsut tunngavigalugit. Ilaat piniartut (inuussutissarsiutigalugu, sunngiffimmi imaluunniit tammajuitsussarsiniartitsilluni) ilaat pisuttuartartut, takornariat aalisariat ilisimatusartullu.

Tikittartut assigiinngitsunik soqutigisaqarlutik kissaateqarlutillu tikittarput, nunallu atorneqarneranut isummat assigiinngissinnaasarput. Assersuutigalugu suliffeqarfiit ilaasa aningaasarsiutigisarpaat mittarfiup eqqaani takornarianik angallassissallutik umimmannik takornariartillugit – umimmannialli ilaat aamma Kangerlussuup illoqarfia qimappallaarnagu umimmanniarusuttarlutik. Aaqqiagiinngissutaasinnaasoq alla tassaavoq piniartut akornanni: piniarnermi pisuttoqassanersoq imaluunniit qimussertoqassanersoq imaluunniit motorilinnik assartuuteqarluni piniartoqassanersoq.

Tamakku tunngavigalugit Namminersorlutik Oqartussat Kangerlussuarmi soqutigisaqaqatigiit assigiinngitsut suleqatigalugit Kangerlussuup aqutsivigineqarnissaanut pilersaarummik suliaqarpoq junimi 2010-mi atuutilersumik. Pilersaarummi anguniarneqarpoq soqutigisat assigiinngitsut akerleriissutaasinnaasut aqutsivigineqarnissaat, taamaalilluni soqutigisallit tamarmik immikkut Kangerlussuup eqqaa pissarsiaqarfigilluarsinnaaniassammassuk.



Kangerlussuup eqqaata aqutsivigineqarnissaanut pilersaarusiami paasissutissat pingaarnerit

Kangerlussuup eqqaa pingasunngorlugu agguarneqarpoq – nunap assinga ataaniittoq takuuk: a, b aamma c:

A) Kangerlussuup avannaani qimusserluni piniarneq imaluunniit pisuinnarluni piniarneq salliutinneqarpoq. Nuna tamanna aamma takornarianit pisuttuartartunit ilisimatusartunillu tikinneqartarpoq. Motorilinnik angallateqannginnerup kingunerisaanik nuna tikinneqartanngitsutut isikkoqarpoq.



B) Kangerlussuup illoqarfiata sermersuarmilu punkt 660-ip akornaniittoq nuna pisuttuartartunut takornarianullu naatsorsuussaaneruvoq. Aqqusinioreersuni taamaallaat motorilinnik angallatinik ingerlasoqarsinnaavoq, aqqutinilu aalajangersimasuni qamuteralaat ingerlasinnaapput. Nunami tassani piniarneq inerteqqutaavoq umimmannik takornariat allallu eqqarsaatigalugit.



C) Kangerlussuup illoqarfiata kujataaniittoq nuna annertuumik piniarfiuvoq. Kangerlussuup imeqarfiullu illersugaasup akornanni (C1) piniarneq taamaallaat qimusserluni pisulluniluunniit pisinnaavoq. Nuna tamanna uumasut nunap immikkoortuanut B-mukartut aqqutigisinnaavaat taamaalilluni takornariat uumasunik siumuisinnaanngorlugit. Inuussutissarsiutigalugu aamma tammajuitsussarsiniartitsinermut atatillugu piniarneq nunap immikkoortuini C2 aamma C3-mi pisarput, tassanilu ukiukkut piniarnerup sukumiinerusumik ingerlanneqarsinnaanissaa anguniarlugu angallatinik motorilinnik pisanik assartuinermut atugassanik immikkut akuersissusiortoqarsinnaavoq.



Kangerlussuup eqqaata aqutsivigineqarnissaanut pilersaarusiaq juni 2010-meersoq ataani aaneqarsinnaavoq. Pilersaarusiaq kalaallisut qallunaatullu nassaassaavoq.







Kangerlussuup eqqaata aqutsivigineqarnissaanut pilersaarusiaq.