Silap pissusaanut naleqqussarneq

Pinngortitamut, Nukissamik pilersuinermut Silallu pissusaanut Immikkoortortaqarfiup silap pissusaanut naleqqussarnissamut misissuinerit suliarai, taakkulu siunertaraat, uagut inuiaqatigiittut silap pissusaata allanngorarneranut naleqqussarnissamut sillimalluarnissarput. Taassuma saniatigut, Issittumi Siunnersuisoqatigiit suleqatigalugit silap pissusaata allanngorarneranut naleqqussarnissamut suliat ingerlapput.

Nanoq Trawl Polar Seafood

Asseq: Polar Seafood A/S

Silap pissusaanut naleqqussarnermut nalunaajaatit immikkuutaartut

Naalakkersuisut silap pissusaanut naleqqussarnermut nalunaajaatinik suliaqartuarpoq, taakkulu siunertaraat silap pissusaata allanngorarnerata kingunerisinnaasai misissussallugit, kingunerisinnaasanut ajunngitsunut ajortunullu aaqqiissuteqarniarluni atortussanik taakkartuinissaq aamma silap pissusaata allanngorarnerata ajunngitsortaanik atorluaanissaq isumannarniarlugu.

Silap pissusaanut naleqqussarnermut nalunaajaat siulleq Inatsisartut 2012-mi ukiamut ataatsimoorneranni saqqummiunneqarpoq, aalisarnermullu piniarnermullu tunngalluni. Nalunaajaat tamarmi uani atuarneqarsinnaavoq

Silap pissusaanut naleqqqussarnermut nalunaajaat aappaat, umiartornermi silap pissusaanut naleqqussarnissamut millisaanermullu suliniutinut tunngavoq, 2015-imilu Inatsisartunut agguaanneqarluni. Nalunaajaat uani atuarneqarsinnaavoq.

Silap pissusaanut naleqqussarnermut nalunaajaat pingajuat, nunalerinermi inuussutissarsiornermut tunngavoq, 2017-imilu Inatsisartut upernaakkut ataatsimoorneranni agguaanneqarluni. Nalunaajaat uani atuarneqarsinnaavoq.

 

Issittumi Siunnersuisoqatigiit ataanni Canadap Danmarkillu suleqatigiinnerat

Saniatigut Pinngortitamut, Nukissamik pilersuinermut Silallu pissusaanut Immikkoortortaqarfiup, Issittumi Siunnersuisoqatigiit ataanni Canada Danmarkilu suleqatigalugit Baffinip kangerliumarngani / Davisstrædemi silap pissusaata allanngorarneri, silallu pissusaata allanngorarneranut naleqqussarnermut iliusissat ersersinniarlugit suliaqarput.

Paasisimasaqarneq Paasissutissallu

Silap pissusaanut naleqqussarnerup aallaavigaa paasisimasaqarneq. Taamaammat Kalaallit Nunaanni silap pissusaata allanngorarneranut tunngasut paasisitsiissutigineqarluarnissaat pingaartinneqarpoq. Paasisaqarnerorusukkuit www.climategreenland.gl takuuk.