VVM

VVM-ip isumaa tassaavoq Avatangiisinut Sunniutinik Naliliineq. VVM sulineruvoq, tassani misissorneqartarluni, suliaq avatangiisaasunut qanoq sunniuteqassanersoq pillugu. Avatangiisinik innarlitsaaliuinissamut inatsit malillugu Naalakkersuisut tamatumunnga akuersiteqqaartinnagit nunami sanaartukkat ilaat aallartinneqarsinnaanngillat allanngortinneqarsinnaanatilluunniit.

Sooq VVM?

Sanaartukkap avatangiisinut sunniutigisinnaasai pillugit paasissutissanik pisariaqartinneqartunik Naalakkersuisut pissarsisussaapput, taamaalilluni sanaartukkap avatangiisinut sunniutigisinnaasai sanaartukkap sananeqarneranut atatillugu iluaqutissanut naleqqiullutik akuersaarneqarsinnaanersut aalajangiiffigineqarsinnaassammat.  Tamanna sanaartukkanik pilersitsinermut, alliliinermut allannguinermulluunniit atuuppoq.

Tamatuma saniatigut nassuiaammi iliuusissanut, sanatitsisup avatangiisinut sunniutissanik pitsaanngitsunik akiuiniarluni atulersitassanik siunnersuuteqartoqassaaq. Nassuiaammi avatangiisinut ajortumik kinguneqannginnissaanut suleriaatsiminut ilanngussassaminik sanaartortitsisoq aamma siunnersuuteqassaaq.

Sanatitsisoq VVM-imut nassuiaasiortussaavoq

Sanatitsisoq VVM-imut nassuiaammik suliaqartussaavoq.  Sanatitsisoq VVM-imut nassuiaammik suliaqannginnermini avatangiisini pissutsit pisariaqartut suut misissorneqassanersut pillugit sukumiisumik pilersaarusiussaaq, taannalu Terms of Reference-mik taaguuteqarpoq. VVM-imut nassuiaatip aallartinneqannginnerani pilersaarut taanna Avatangiisinut Naalakkersuisumit akuerineqartussaavoq.

Sanatitsisoq misissugassanik pisariaqartinneqartunik suliaqarnissamut, aammalu paasissutissanik, VVM-imut nassuiaatip suliarineqarnissaanut atugassanik pissarsiniarnissamut akisussaasuuvoq.

Tamanut ammasumik tusarniaaneq innuttaasunillu akuutitsineq

Avatangiisinut Pinngortitamullu Naalakkersuisoq sanatitsisup sanatitsisumut Terms of Reference-ip sapaatit akunnerini arfinilinni tamanut ammasumik tusarniaassuteqarnissaanik piumasaqarsinnaavoq, tamatumani tusarniaaneq paasissutissanik nutaanik pissarsinissamut iluaqutaasinnaasoq Avatangiisinut Pinngortitamullu Naalakkersuisoq naliliippat.  Aamma VVM-imut nassuiaatip suliarineqarnerani innuttaasunik ataatsimiititsisoqarnissaa, imaluunniit arlaatigut innuttaasunik akuutitsisoqarnissaa Avatangiisinut Pinngortitamullu Naalakkersuisumit piumasarineqarsinnaavoq.

Tamat oqaaseqaatinik saqqummiussinissaat anguniarlugu piffissaq tusarniaaffiusoq VVM-imut nassuiaatip saqqummiunneqarneraniit sapaatit akunnerinik arfineq pingasunik sivisussuseqassaaq. Piffissap tusarniaaffiusup qaangiunnerani Avatangiisinut Naalakkersuisumit pisariaqarsorineqarpat, sanatitsisup VVM-imut nassuiaat iluarsaatissavaa.

VVM-imut nassuiaatip iluarsaanneqarnera annertuppat, Avatangiisinut Naalakkersuisoq nutaamik tusarniaaqqissaaq.

Inatsisiliorneq

VVM-imut nassuiaatit ukunani maleruagassiuunneqarput:

VVM-imut nassuiaasiortussaatitaaneq

Sanaartukkat tamatigut VVM-imut nassuiaasiortussaatitaaffiusut, VVM-imut nalunaarummut ilanngussaq 1-imi allassimapput. Ilanngussaq aaneqarsinnaavoq ugguuna.

Ilanngussaq 1-imi allattuiffimmut tunuliaqutaasut tassaapput, nunani tamalaani pisussaaffiit, Kalaallit Nunaata ESPOO-mut isumaqatigiissummut akuersinerminut atatillugu akuerisai.

Aammattaaq VVM-imut nalunaarusiamut ilanngussaq 2-mi sanaartukkat, pisuni tamani sanaartukkamut VVM-imut nassuiaasiortoqarsimanersoq nassuiaasiortoqarsimannginnersorluunniit Naalakkersuisut naliliiffigisassaat allassimapput.

Ilanngussaq 2 aaneqarsinnaavoq ugguuna.

 

Saqqummiussat

Ilulissat Mittarfiannut ASN-imut akuersissut