Umiarsuit angallannerannit mingutsitsinermik aniatitsineq pillugu nalunaarusiaq

Nunarsuarmi imarsiorluni angallanneq silaannarmik mingutsitsinermut annertuumik pisooqataavoq, aammalu Kalaallit Nunaat usinik assartuussinermut, aalisarnermut, umiarsuarmik takornariartitsisarnermik aammalu nalinginnaasumik imaatigut angalanermut tunngatillugu umiarsuarmik angalanissamik pinngitsuuisinnaanngilluinnarpoq.  

Pinngortitamut Avatangiisinullu Naalakkersuisoqarfiup nalunaarusiaq umiarsuit angallannerannit mingutsitsinermut tunngassuteqartoq suliaraa.

Nalunaarusiami Kalaallit Nunaata 3 sømilinut killeqarfiata iluani akuutissanik mingutsitsisartunik aniatitsinerup maleruagassiivigineqarnerani iluaqutissartaasut ajoqutissartaasullu misissorneqarput. Nalunaarusiami gassinik silaannarmik kissatsitsisartunik, svovlimik, NOx-imik aamma pujoralannik aniatitsineq sammineqarpoq.

Nalunaarusiami nunani tamalaani maleruagassat, Kalaallit Nunaanni 3-sømilinut killeqarfiup iluani imarsiorluni angalanermit akuutissanut mingutsitsisartunut taakkununnga maleruagassiisut, ilanngullugu MARPOL-imi isumaqatigiissut, allaaserineqarput. MARPOL-imi isumaqatigiissut umiarsuarnit mingutsitsinermik pitsaaliuinissamut tunngassuteqarpoq. Kalaallit Nunaata nunani tamalaani isumaqatigiissut 1997-imi ilaaffigilerlugu akueraa. Kalaallit Nunaat suli ilanngussamut, umiarsuit angallannerannit silaannarmik mingutsitsinermut tunngassuteqartumut, tunuarsimaarfeqarpoq.

Nalunaarusiami tikkuarneqarpoq, Kalaallit Nunaat piumasaqaatit nunani tamalaani isumaqatigiissummut ilanngussami silaannarmik mingutsitsinermut tunngasumi aalajangersagaasut malissallugit aalajangissappat, tamanna Kalaallit Nunaannut ajoqutissartaasunit amerlanerusunik iluaqutissartaqartussaasoq. Akuutissanik mingutsitsisartunik aniatitsinermi annikillisitsineq, avatangiisinut, peqqinnissamut aamma silaannaap pitsaassusaanut ajoqusiisumik annikinnerusunik sunniuteqarluni, inuiaqatigiit aningaasaqarnerannut iluaqutaasussaavoq.

Nalunaarusiaq uani atuaruk