Århus-imi isumaqatigiissut


Kalaallit Nunaannut tunngatillugu Århusimi isumaqatigiissut pillugu ilisimasat nutaat

Pinngortitamut Avatangiisinullu Naalakkersuisoqarfiup Aarhus Universitet suleqatigalugu sulianut tunngasoq nalunaarusiaq suliaraa, tassani allaaserineqarluni Kalaallit Nunaata Århusimi isumaqatigiissutip malinnissaa kisaatigissagaluarpagu, inatsisit suut allanngortinneqartariaqassanersut.

Århusimi isumaqatigiissut innuttaasut avatangiisinut paasissutissanik pissarsinissamut, avatangiisinut apeqqutinut tunngatillugu aalajangiinissamut sulianik ingerlatitsinermi tamanut ammasumik peqataanissamut kiisalu suliassanik eqqartuussivimmi suliakkiisinnaatitaanissamut periarfissaqarnerannut tunngassuteqarpoq. Århusimi isumaqatigiissut Århusimi 25. juni 1998 atsiorneqarpoq aammalu Danmarkimi 2001-imi atuutilerluni. Kalaallit Nunaata nunani tamalaani isumaqatigiissut ilaaffigilerlugu akuerisimanngilaa.

Suliassaqarfimmi tassani Kalaallit Nunaata inissisimanera pillugu nalunaarusiami takutinneqarpoq, Århusimi isumaqatigiissutip tassani ilaaffigilerlugu akuerineqarnissaa kissaatigineqarpat, inatsisini assigiinngitsuni amerlasuuni allannguuteqartitsisoqartussaassasoq.

Maleruagassat suut nunani tamalaani isumaqatigiissut naammassisinnaajumallugu allannguuteqartinneqartariaqassanersut kisimi nalunaarusiami sammineqarpoq. Nalunaarusiami allaffissornikkut aningaasaqarnikkullu aningaasartuutaasussat, aamma maleruagassat allannguuteqartinneqarnerannut imaluunniit allannguutit taakkua aqunneqarnerannut tunngasut, isummerfigineqanngillat. 

Nalunaarusiaq inatsisilerinermi sulianut tunngasunut nalunaarusiaavoq, inatsisit nalunaarusiami taaneqartut ilai siunissami allanngortinneqassagaluarpata, isumassarsiorfissanut ilaasussatut naatsorsuutigineqartoq.