Imaani avatangiisit

Kalaallit Nunaat immamik avatangerneqarsimavoq, aammalu imaq nunatsinnut isumalluutaavoq pingaarutilik. Kalaallit Nunaanni immami avatangiisinut akisussaaffik Kalaallit Nunaata Danmarkillu akornanni avitaavoq.

3 sømilinut killeqarfiup iluani Kalaallit Nunaat akisussaaffeqarpoq.

Imaani avatangiisinut 3 sømilinut killeqarfik eqqarsaatigalugu oqartussaassuseqarneq 1. januar 1993-imiilli Namminersorlutik Oqartussat akisussaaffigaat. Namminersorlutik Oqartussat imartanut 3 sømilit iluanniittunut akisussaasuupput.  Tassani imartat tiffasinnerusumiittut, soorlu kangerlunni kangerliumanernilu, kiisalu 3 sømilit avammut tikillugit imartat avasinnerusut tamarmik pineqarput.

Sumiiffinnut taakkununnga inatsisit uku atuupput:

3 sømilinut killeqarfiup avataani danskit akisussaaffeqarnerat

Danmark 3 sømilimit killeqarfimmit 200 sømilit tikillugit akisussaasuuvoq, tassa aningaasarsiorfiup ilua (EEZ). 3 sømilinut killeqarfiup avataanut kunngip peqqussutaa 2004-meersoq atuutsinneqarpoq.

Aatsitassarsiornermut akisussaaffik

Aatsitassanut tunngasut Kalaallit Nunaata 2010-mi oqartussaaffigilerpai.  Aatsitassarsiornermut atatillugu aatsitassarsiorneq sumiluunniit ingerlanneqaraluarpat immami avatangiisinut Aatsitassaqarnermut Aqutsisoqarfik akisussaasuuvoq.

Nunat tamalaat suleqatigiinnerat aamma nunat tamalaat akornanni isumaqatigiissutit

Imaani avatangiisit mingutsinneqartarneranni nunat killeqarfiit apeqqutaasanngillat, mingutsitsinerlu isorartoorujussuarmut siaruarsinnaavoq. Kalaallit Nunaat imaani avatangiisinik mingutsitsinerup sapinngisamik killilersorneqarnissaa pillugu nunat tamalaat akornanni isumaqatigiissutinut assigiinngitsunut taamaammat ilaavoq. Imaani avatangiisit pillugit suliassaqarfimmi Kalaallit Nunaat assersuutigalugu MARPOL-imut isumaqatigiissummut, CAN-DEN-imut isumaqatigiissummut aamma OSPAR-imut isumaqatigiissummut ilaavoq.