Poortuutissat

Poortuutissat pinngortitamut qimanneqaraangamik avatangiisinut innarliisinnaapput. Puiaasaq atuisup imaarpagu, puiaasap utertinneqarnissaa pingaaruteqarpoq, taamaalillunilu atoqqinneqarnissaa, imaluunniit poortuutissamik nutaamik sananermut atorneqarsinnaaniassammat.

Poortuutissat suuppat?

Poortuutissat tunisassianut, tunisassiortumiit atuisunut nioqqutissanik poortuinermut, toqqortaqarnermut, illersuinermut assartuinermullu atorneqartartunut taaguutaavoq. Poortuutissat saviminermik, igalaaminermik plastikimilluunniit sanaajusinnaapput.

Inatsisiliorneq

Kalaallit poortuutissanut inatsisaanni poortuutissat, immiaaqqanut imeruersaatinulluunniit atorneqartartut sapinngisamik annertunerpaamik utertitsisarnermut ilaatinneqarnissaannut, taamaalillunilu poortuutissat Kalaallit Nunaanni pinngortitamut ajoqusiinnginnissaannut qulakkeerinissaq siunertarineqarpoq.

Immiaaqqanut imeruersaatinullu kulsyrimik akoqartunut poortuutissanut maleruagassat uani nassaarineqarsinnaapput: Immiaaqqat imeruersaatillu kulsyrimik akullit puui pillugit Namminersornerullutik Oqartussat nalunaarutaat nr. 16, 28. maj 2002-imeersoq.

Kalaallit Nunaanni utertitsisarneq

Kalaallit Nunaanni immiaaqqat sodavandillu puiaasanut igalaaminernut ”pualasuunut” plastikiinulluunniit poorlugit sassaalliutigineqartarput. Utertitseriaatsitta atuunneratigut Kalaallit Nunaanni puiaasat igalaaminiusut plastikiusullu 98-99%-ii utertinneqartarput.

Tunumi Avannaanilu immiaaqqat sodavandillu qillertuusanut tunisaanissaat akuerisaavoq.  Kitaani immiaaqqanik sodavandinilluunniit qillertuusanik tuniniaasoqaqqusaanngilaq.