Imeq imigassaq

Kalaallit Nunaanni imeq imigassaq amerlanertigut tatsinit kuunnillu pissarsiarisarparput. Nukissiorfiit illoqarfinni nunaqarfinnilu imeqarfiit aqqutigalugit imermik imigassamik peqqinnartumik naammattumillu pissarsisinnaanissaq akisussaaffigaat. Namminersorlutik Oqartussat oqartussaasutut akuersisarnermi aammalu imermik pilersuinermik misissuisarnermi arlalinnik suliassaqartarput.

Imeqarfinnik imermillu tunisassiassamik akuersisarneq

Imeq imigassaq suli soorlu tatsiniikkallartillugu kuunniikkallartilluguluunniit imermik tunisassiassamik taaneqartarpoq. Imeqarfiit imeq tunisassiassaq atuisunut apuunneqannginnerani suliarisarpaat salittarlugulu. Kalaallit Nunaanni imeqarfiit 72-it missaanniipput. Imeqarfik allanngortiterneqassappat, imaluunniit nutaamik sanasoqassappat Namminersorlutik Oqartussat tamatumunnga akuersissuteqaqqaartussaapput.

Imeqarfinnut killeqarfiit peqqissutsitsinnut suliffissuaqarnitsinnullu pingaaruteqarput

Kuuit tatsillu, imermik pilersuinermut atorneqartut nunataanni imeqarfinnut killeqarfissat aalajangersarneqartarput. Imeqarfiit killeqarfiisa iluini mingutsitsisunik suliaqarnissaq inerteqqutaavoq. Qamutit motoorillit atorlugit angalanissaq, illuliornissaq, uumasuuteqarnissaq aammalu suliffeqarfinnik inuussutissarsiutinik ingerlataqarfiusunik ingerlatsinissaq inerteqqutaavoq. Imeqarfiit killeqarfii taakku ungasinngitsukkut NunaGis aqqutigalugu takuneqarsinnaalissapput.

Imeqarfiit killeqarfiisa ataqqineqarnissaat pingaaruteqarpoq, imeq imigassaq mingoqanngitsoq peqqissutsitsinnut suliffissuaqarnitsinnullu pingaaruteqarmat. Imeq mingoqarpat, aalisakkeriviit assersuutigalugu tunisassiornissamut akuersissut pigisartik annaasinnaavaat.

Namminersorlutik Oqartussat imeqarfiit killeqarfiinik aalajangersaanissaq akisussaaffigaat, aammalu sulianut pissutsinullu ataasiakkaanut saneqqutsisinnaanermik akuersissuteqarnissamut oqartussaaffigalugu. Taseq imermillu passussivik naammaginartumik qajannaassuseqartutut naliliiffigineqarpata, Namminersorlutik Oqartussat maleruagassanik immikkut ittunik, pissutsinik sulianillu imeqarfiup iluani inerteqqutaasussaagaluanik ingerlataqarnissamut akuersissuteqarfiusunik aalajangersaasinnaapput.

Erngup pitsaassusianik misissuisarneq aamma imeqarfinnik nakkutilliineq

Imeqarfiit pilersaarut, Namminersorlutik Oqartussanit aalajangersarneqarsimasoq malillugu erngup pitsaassusianik akuttoqatigiinnik misissuisarput. Erngup pitsaassusianut piumasaqaatit malinneqarnersut Namminersorlutik Oqartussanit misissorneqartarpoq, aammalu imeqarfiit, imermik tunisassiassamik pilersuineq imeqarfiillu killeqarfii nakkutigineqarlutik.

Inatsisiliorneq

Avatangiisit innarlitsaaliorneqarnissaanik Inatsisartut inatsisaanni nr. 9-mi, 22. november 2011-meersumi kapitali 6 imermut imigassamut suliassaqarfimmi inatsisitigut tunngavigineqarpoq. Imeqarfiit killeqarfiinik pilersitsinissamut, imeqarfinnik akuersinissamut kiisalu nakkutilliinissamut misissuinissamullu inatsisitigut tunngaviusut iluarsaanneqartussaapput ingerlaavartumillu iluarsineqartartussaallutik.  Suliassaq taanna Namminersorlutik Oqartussanit isumagineqarpoq. Uani atuarneqarsinnaavoq.