Piniarneq

Maannamut paasisitsiniaanermit allaasumik meeqqanut tunngatitamik nutaaliortoqarpoq. Pinnguaat Piniarneq meeqqat atuarfianni 5. aamma 6. klasseniittunut naleqqussagaavoq, taamaattumillu saaffigisai tassaallutik siunissami immami angalasartussat.

Meeqqat pissangaqisut ilagalugit Piniarneq IAAN-ip oktoberip 19-ianni saqqummiuppaa. Pinnguaat atuartunit nuannarineqarluarpoq, nerrivinnilu pissanngattunnguaqarpoq kina pinnguaammik akissarsilluni ajugaassanersoq.

Pinnguaat Nunatsinnut naleqqussagaavoq. Taamaattumik pinnguaatip naqqa apeqqutillu immami isumannaallisaanermut tunngasut ilisarnarluinnarput. Pinnguarnermi ajugaassaguit uumasunik pisaqartariaqarputit soorlu aavernik, nannunik umimmannillu. Pinerrarinnerli kisimi apeqqutaanngilaq. Isumannaallisaanermuttaaq atortut eqqortut pigissavatit. Tamaanngippat imaalluarsinnaavoq aallarfinnut utertitaasutit.

Piniarnerup isumannaallisaanerullu ataqatigiinnerat meeqqanut piumasaqaateqarpoq. Pingaartumik nukappiaqqat uninnganeq sapingajattarput aallaanninniartoqaleraangat. Ilisarinnissinnaaneq pissanganerlu pinnguaatip pitsaaqutigigai pinnguaammIK ineriartortitsisoq Christian Kirk Muff isumaqarpoq. Erseqqissarpaa meerarpassuit nalunngikkini usorungaartartut tusaraangamikku kalaallit meerartaat piniarnissamut pinngortitarsuarmilu misigisaqarnissamut qanoq periarfissaqartigisut.

Piniarneq ineriartortinneqarsimavoq Empati suleqatigalugu. Pinnguaammik isumassarsisuupput ilinniartitsisut Jørgen Thomsen aamma Morten Vittrup.