Upalungaarsimanermut ataatsimiititaliaq

Taamanikkut Naalakkersuisuusut 20. december 2001-mi aalajangerput upalungaarsimanermut ataatsimiititaliarsuaq pilersinneqassasoq, taassumalu siunertarissagaa annertuumik ajutoortoqartillugu ajunaarnersuaqartilluguluunniit, taakkununnga ilaalluni ajornartorsiortoqartillugu sorsuttoqartilluguluunniit, Kalaallit Nunaanniit Danmarkimiillu annaassiniarnermi akuutinneqartussat ataqatigiissarnissaannut tunngavissiinissaq.

Upalungaarsimanermut Ataatsimiititaliarsuaq Inatsisartut Inatsisaanni nr. 14 26. maj 2010-meersumi tunngavissinneqarpoq.



Upalungaarsimanermut ataatsimiititaliarsuaq ilaasortaqarpoq Namminersorlutik Oqartussaneersunit, Nakorsaq Peqqinnissakkut Nakkutilliisoq, kommunineersumik, Kalaallit Nunaanni Politimestereqarfimmiit, Naalagaaffiup Sinniisoqarfianiit kiisalu Issittumi Sakkutooqarfimmiit. Ataatsimiititaliarsuarmut siulittaasuuvoq Avatangiisinut Pinngortitamullu Naalakkersuisoqarfimmi pisortaq.



Ataatsimiititaliarsuup suliassaasa pingaarnersaannut ilaavoq upalungaarsimanermut iliuusissat Kalaallit Nunaannut tamarmut tunngasut suliarissallugit pilersaarutillu ataavartumik naleqqussarneqartarnissaa qulakkiissallugu. Tamatuma saniatigut Ataatsimiititaliarsuup makku isumagissavai:

  • Upalungaarsimanermut tunngasuni Naalakkersuisut, borgmesterit Naalagaaffimmilu oqartussaasut siunnersussallugit ilisimatissallugillu.
  • Politimesterip piumasaqarneratigut Kalaallit Nunaanni oqartussat upalungaarsimanikkut iliuuseqarnerat ataqatigiissassallugu atuutilersissallugulu, tassunga ilaalluni nunanit allaniit oqartussaasut iliuuseqassappata tamatuma ataqatigiissarnissaa.
  • Kalaallit Nunaanni suut aarlerinarsinnaanerannik eqqumaffigisassaanerannillu nalilersuinermi sulissalluni.
  • Kalaallit Nunaanni oqartussaasut tusagassiuutinut attaveqarneranni ikiuunnissaq ataqatigiissaarinissarlu.